煤氣年年十送一紅股 月供5,000元累積財富｜龔成信箱
撰文：龔成 ｜圖片：新傳媒資料庫
1．煤氣（0003）
你好，我想問「龔成信箱」,但不知道要寫去哪裡,所以在這裡發問。
龔sir你好，有睇過你本80後百萬富翁,我是投資經驗很少，希望可以指點一下
先自我介紹,今年26歲,月收入22k,供緊一層樓,每月供5k,3k家用,2k還款比母親,5k月供股票全數供中華煤氣,現有約市值5萬左右,其餘的就是日常洗費,現時一個人居住,所以都是外出食飯,與父母親分隔兩地,不能同住。
想問一下：現時一直供5000全數煤氣是否正確,還是應該分散一點,供煤氣原因主要因為十送一紅股,累積下去,數字會很可觀。
龔成老師：
對呀，在這裡fb PM我，已經是【龔成問題信箱】了。
自住樓不用改變，繼續保持供款就可以。
煤氣（0003）是有質素的股票，可以長線月供，一直持有，佢多數年份都會有10送1，但股價會因此而下調10%，這是正常的現象，但你可能見佢股衝多年都是十幾蚊，這是由於佢送股後，股價下調，但之後又慢慢升翻，這反映佢每年股價的實質升幅，都有10%。
之前持有的煤氣，可一直持有。不過，如果你的組合，只有煤氣一隻股票，那就會有較大的集中風險，你最好在之後的月供股票，減少供煤氣，增加其他的股票，例如最簡單增加盈富（2800）。（對照龔成信箱：Q5027）
2．5-6萬澳元存款
Hi龔成:)
我自從開始睇你個page 後先慢慢理解投資既重要，但仍然係初哥。
我有大概5-6萬澳元存款, 你認為應該繼續渣係手（我仍然期望佢會升值）定係兌換左佢地去投資其他野好？
龔成老師：
貨幣始終是長期貶值的項目，因為現金不是財富，雖然中短期可能會上升，但長期來說，所有貨幣都會貶值，因此，你可以將部分賣出，然後投資其他項目會較好。
物業、優質股，這些才是真正的資產，是真正的財富，雖然中短期價格會有上落，但長期一定上升。不過現時都不算平，所以，你策略上，可以逐少逐少買入，但長遠來說，持有這些項目是大方向。（對照龔成信箱：Q5023）
3．1212、 2136 、 2183 應該點揀
龔 Sir 你好，請問利福國際 1212，利福中國 2136 同 利福地產 2183 應該點揀？
啟德塊地既發展會直接利好上面邊一隻股呢？算潛力股嗎？
謝謝你
龔成老師：
利福國際（1212）是較好的，當中包拾了崇光的業務，同時持有了優質的物業，啟德地都是這公司的，1212是最穩健同平衡的。我對這股發展正面的。
2016年，佢以近$74億投得啟德商業地，利福國際計劃於該地興建兩幢大廈，當中包括建立新的崇光百貨店，連同其他商業、娛樂及飲食設施，以拓展崇光百貨的零售業務，以及持有作收租用途。新項目預期將於2022年前落成。
利福國際將繼續用地產加百貨的模式發展，購入有相當價值的黃金地段，將百貨店進駐其中經營，提高百貨店的品牌及生意，物業其餘部分用作收租，長遠享受物業價值的提供、百貨店在黃金地段的業務提升、租金收入的長遠升值。
簡單來說，就是地產加百貨，購入黃金地段，注入百貨業，而百貨業務產生品牌及人流效應，從而對持有周邊地收租的利福，產生亙相提升價值的效果，絕對是長遠增值的業務模式。（對照龔成信箱：Q5024）
4．買黃金
老師，美國加息，有股票行人叫我買黃金，佢話風險大不大，但我知佢地賺佣金
跟住最近有人叫我買基金，但銀行有認購費，基金管理費和轉換費。有時都唔知買乜好
龔成老師：
係呀，你要小心分析佢地背後的目的，我都做過經紀，我都明當中心態。
我唔會用黃金做對沖加息，因為這種直線分析，未必正確。
另外，有唔少基金都有一定的手續費，所以，我經常叫人買盈富基金（2800），每年管理費只要0.1%，比傳統基金低好多。
所以，我地要懂得獨立分析，最重要是自己想建立一個點樣的財富組合，同埋當時的投資環境，各資產處平或貴，別人的推介，不用理會。（對照龔成信箱：Q5025）
5．買金沙長線投資
我有野唔明，你成日話要買金沙，要長線投資，但如果我早幾年$60買，到而家一樣蝕錢，點解釋？
龔成老師：
首先，我地投資是長年期，即是5年以上，所以要睇遠d。
第二，金沙的合理估值在27-40（這在我課堂有講過），所以點解我在$21買入，就係佢低過合理價。
另外，我地唔會用過往的股價，盲目進斷將來。將來的股價走向，長遠基於這企業的質素及前景。
記住，買股票就是買企業，股價是市場報價，這個短期的報價可以同企業無關，你要著重企業，不要太理會股價。強烈建議你學習巴菲特的投資方法，因為佢套方法真的賺錢。（對照龔成信箱：Q5033）
6．保持工作熱情
老師，多謝你的回覆與鼓勵，我今天已經請辭了，如果早多幾年認識你就好
其實小弟最弱就係要我保持住一團火，想請教下，有咩方法可以不斷保持
我成日一鼓作氣，之後便散漫下來
龔成老師：
你要用一d方法，每日提醒自己，每個人都有佢最有動力，同埋最怕的事。
例如你的目標是幫屋企人改善生活，你就要經常用家人生活得好，作為一個畫面，提醒自己要有一圈火，每次面對挫折時，都用這畫面提自己，令自己唔怕困難。
所以，你要定目標，你要強化慾望，令自己有更大的推動力。
另外，每個人都有佢怕的事，你都可以利用，例如當定成唔到目標，就會有某些後果，例如你身邊人的失望，當你每次想起時，就會令你進入一個「非成功不可」的狀態。
記住，能否完成目標，同你的能力無關，同你的決心，同你有多少渴望，有最大的關係，加油！（對照龔成信箱：Q5028）
7．政府工
你好，想問下
打政府工有咩唔好處？
龔成老師：
政府工有好有唔好，好處是福利好，收入穩定，這會有利借錢買樓，只要善用這方面的資金及空閒時間，會滾存到一定的財富。
壞處是太穩定，你個人會變得太安穩，唔想突破，你的人生會被設限。
當你入左政府工，就有可能唔想再跳出來，你有可能同出面社會情況脫節左。你唔想做一d好突破的事，你唔會走去創業，你唔會試好多份工，而選一份最好的。（對照龔成信箱：Q5029）
8．教育股前景
請問教育股前景如何？
6068 睿見教育 & 1317楓葉教育 好d呢？thx
邊隻好d
龔成老師：
睿見教育（6068）同楓葉教育（1317）都是有質素的股票，增長力都不錯。
睿見教育主要於中國提供民辦基礎教育，包括小學、初中及高中。佢
較專注於為小學及中學學生提供中國課程計劃，除中國課程計劃外，集團還為高中學生提供國際課程，國際課程的畢業生通常被海外大學及學院錄取。
而楓葉教育（1317）營辦高中、初中、小學、幼兒園，業務核心是實行雙課程及雙文憑高中教育，學校獲得中國及加拿大英屬哥倫比亞省教育部認證，高中畢業生可同時獲授認可的加拿大英屬哥倫比亞省教育部高中文憑及中國高中文憑。
而增長力來說，楓葉教育會略高少少，同埋由於睿見教育的上市年期不算太耐，因此有可能慢慢「見真章」，當中會有少少未知數，所以我較偏向楓葉教育。（對照龔成信箱：Q5030）
9．5G
想請教老師對 5G 概念 6869長飛及763中興的睇法，謝！
另外老師，今年會有計劃開Sat class嗎？因在職人士很難安排上weekday class,謝
龔成老師：
5G將進入投資期，行業的資本開支會較大，但潛力亦不能忽視，但一定要有耐心，唔好太心急行業會太快有回報。
長飛光纖光纜（6869）長飛光纖光纜係光纖預製棒、光纖及光纜的全球市場領導者。相信長線正面，但我唔會預佢有爆次性的增長，會平穩增長，佢的股價都幾波動，就係因為市場估佢增長得好勁，當預期有少少變，股價都會受壓。
中興通訊（0763）係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。
因此，這股有穩中求勝的作用，長線正面，但由於股價升左唔少，投資要分注。
我5月的股票班是星期六，但見諒已爆了。
之後都會有星期六班，但不常搞，你可留意。（對照龔成信箱：Q5031）
10．港交所（0388）
你好，想問下月供加埋港交所得唔得？
其實我睇你本書話，揀優質股加適當時機
可唔可以理解為成交交額持續性偏低同埋普遍向下為入市良機？即系大市如600-900億成交金額
龔成老師：
港交所（0388）係一隻週期股，個市旺時，佢會好賺，股價會好高，個市靜時，佢會賺得少，股價會較低。而股市唔會永遠好，一定會有起有落，所以，投資這股的最佳時機，就是個市好靜的時候。
近期個市旺，因此，並不是投資的理想時機，所以，這刻最好投資其他股。
但港交所的確是一間難得的企業，好有質素，只是近期估值略貴，如果你真的想入，以月供模式是可以的，只要月供時間夠長，買入價就能平均。同時這刻的月供金額一定要細。（對照龔成信箱：Q5032）
