網民激辯港九新界邊區最好住 有人力撐港島區根本贏曬 網民：個個都話自己住嗰區好㗎啦
撰文：經一編輯部｜圖片：Unsplash、政府新聞網、中新社
日前，有網民於討論區發文，以「港島係香港最好亦唯一好住嘅地方」為題，表示港島區是最好住的，因為港島區齊集一切生活所需：住在太古、跑馬地；可以於中上環、灣仔返工；需要娛樂的話就去銅鑼灣，樓主形容「一個島就有齊曬所有嘢，根本贏曬」。帖文一出，網民的反應兩極。雖然有人認同樓主的觀點，表示港島區無論交通、生活、環境都完勝其他區，但有網民卻認為樓主的講法有問題，力撐其他地區。以下，《經一》為讀者整理不同討論區內，網民對於邊一區最好住的觀點。
港島區最好住？
如樓主所言，不少網民紛紛表示，港島區有齊生活、環境、交通配套等，無疑是最好住的區。
有齊生活所需
有數位網民表示，自幼在港島出世，幼稚園、小學、中學、大學都在港島區，長大後中環返工，他們認為樓主的講法十分正確。有人表示如果住在港島，中環返工，放工後落SOHO飲酒，然後行5至10分鐘就能回家，十分方便，反而「住大西北仲要搭車走」。又有人表示：「同朋友出街大家去中環CWB都好近，所以平時都好少需要過海」。
另外，有網民附和樓主，舉例認同港島區真係最好住。
「睇戲去CWB太古城，食飯就灣仔西灣河，溜冰就太古城，甜品周街都有」
講綠化有南區
雖然有網民表示，港島區與新界相比，綠化環境較少。但有網民反指「講環境，港島有南區」，稱南區環境不錯之餘，又能買齊所有生活所需。
多小店、餐廳
有網民回覆樓主，指港島區是否「好住」，應該依照自己的生活習慣而定，更舉例，
「齋講食嘅話，中西區已經乜都有。譬如我自己好鐘意星期六日hea住落街食個健康brunch、飲咖啡，中上環brunch place多到揀唔到，想間中食茶記又有，夜晚食飯飲嘢又多選擇」
有人強調，只有港島區才有特色小店：
「放假行山近近地上山頂又得，講街邊小店都夠多元化，舊式文具店書店、賣酒賣碗碟呢啲小本經營既舖頭中上環大把，識人住新界話直頭搵唔到呢種小店」
住港島區有優越感？
過往，曾有網民開post指「住港島區會有優越感」，稱「住過港島真係返唔到轉頭」，無論是中上環的文化、銅鑼灣的娛樂，加上港島區4面環海，每橦建築都唔同，各有特色，反觀九龍新界的建築根本就一模一樣。衡量種種因素後，與港島區相比根本就是另一個世界。
又有人留言指「百德新街真係正到」、「真，住南區基本上唔需要過海都可以買齊生活所需 」等，同樣力撐港島區最好住。
不過，都有住港島的網民表示，
「成世都住喺港島，200呎又住過，1,200呎又住過，咪又係咁。我估有部份九龍新界長大嘅人，搵到啲錢落港島住就會覺得有優越感囉」
港島區唔好住
雖然有人認同港島區最好住的講法，但亦有網民反對，強調自己住港島區極不方便，反觀九龍、新界，都比港島區更好。
1.物價比其他區貴
有位自稱居住於港島東30年的網民比較九龍及港島的生活配套，指港島區的物價更貴
- 灣仔188 vs 信和
- 灣仔電腦城 vs 黃金高登
- 灣仔駱克道 vs 缽蘭街鴨記
- 玩氣槍嘅話港島更加得一兩間 vs 成條廣華街
他表示，港島區內消費唯一比九龍平的，只有車費，指「電車真係慳錢神物」。
又有網民表示，住香港區的消費好貴
「衣食住行、買嘢都要幫鋪頭交租，起碼貴九龍10-20%，似樣啲嘅街市都無，有嘅都好貴。啲路又舊又窄、多斜路，行都行死。無工、 無司機嘅話住港島，有啲咩優越感？ 方便OT？」
2.不方便
不少網民直言，住港島區並不方便，表示「如果你啲朋友喺哂新界，你都想死啦 」，更有網民稱九龍區最好住：
「去新界同港島都方便，而且九龍乜都有，點解我要去港島住？唔好又話乜時間成本。所謂的成本只不過係睇你平時圈子喺邊。我係荃灣返工，唔通我住港島會方便？」
更有網民指，自己除了返學基本上甚少去港島：
「因為港島冇乜特別嘢好做，我睇戲就荔枝角、尖沙咀；食飯都係九龍或新界（荃灣/葵芳/旺角/尖沙咀）；溜冰就Megabox，甜品就旺角觀塘」
甚至有人指出，由港島出發去機場十分麻煩，而新界、九龍則方便得多。
3.多舊樓、路窄、空氣差
事實上，不少網民留言指港島區的綠化做得沒有新界、九龍好，空氣較差，加上路窄、人多，十分擠迫。
「港島不知幾多舊樓，你寧願住港島40年舊樓定大圍站上蓋」
又有人表示：「中上環迫到X街 人車爭路 烏煙瘴氣，半山啲路又窄又斜，落街食個飯、買嘢都行到X街」。亦有網民表示，駕駛時特別感受到港島區的馬路特別窄。
有人話粉嶺好住？
過往都有不少網民開帖討論香港住邊度最好，有位住在港島區的網民開post，稱自己到粉嶺朋友屋企玩，發現粉嶺的週邊配套足以解決衣食住行的需求，加上空氣質素比港島區好。
有網民認同粉嶺是「幾好住」，但有人卻指出：
「退休嚟講係幾好住，打工仔後生嘅，交通來回閒閒地每日兩個鐘，夜晚又無乜娛樂，近年多左兩間戲院係改善咗，但好多嘢都係要出去買，但如果已經唔使做又有車，北區係幾好住」
網民：個個都會話自己住個區好㗎啦
事實上，邊一區「好住」並沒有標準答案，因人而異。有較中立的網民表示，「個個都會話自己住個區好㗎啦」。
甚至有人指不應一直重複住港島的好處，關於港島的優點，其他區都有，更表示：
「同樣道理，我改哂你以上嘅地點 一樣講得通。住粉嶺都可以話近沙頭角架，Cafe、飲茶、茶記、小店，其他地方無咩？」
亦有網民留言回覆，住新界定市區是一種取捨：
「如果有錢到市區都買到過千尺咁市區係幾好，但係好明顯唔係普通人做到啦，住新界真係地方大啲抖啖氣都無咁焗，又可以得閒踩吓單車，其實幾開心。」
