7大職場上最「要不得」行為！講是非都唔係最討厭？密密做冇Say No原來都係禁忌！｜張慧敏Son姐

撰文：張慧敏（Son姐）｜圖片：unsplash

1. 「愛八掛講是非」

「呢度講呢度散」、「淨係同你講，千祈唔好同人講」、「你知唔知阿邊個邊個點話你」……是否非常耳熟能詳？總有人把所有時間用來八掛、講是非，不知道還有沒有時間做正事？不過這種死八婆處處都有，因為總有上司老闆喜歡聽。老老實實，掌握得好的話，分分鐘能成為職場上位絕技。讀者又有沒有興趣學習？

2.「委屈做、不Say NO」

其實「不Say No」並無問題，純粹是個人選擇，食得鹹魚抵得渴，悉隨尊便。只不過帶着委屈做事就不同說法，說得好像全世界都欠了他一樣，認為自己被逼，同時又覺得自己很偉大，為全世界服務，偏偏無人多謝賞識。職場怨婦就是這樣煉成的。

3.「凡事先拒絕再說」

會持有這種態度的人，人格上有兩種可能，一是極度自我，二是極度自卑。他在工作上亦有兩種可能，一是簡單直接不願做，二就是永遠挑剔別人，認為他人意見通通都錯。講到底，就是為自己「打定底」，結果如真的失敗，就一副與我無關的模樣：「我一早講咗啦！」如果最後成功？他就會繼續發揮乞人憎本色！反正一向都乞人憎，你以為他會在乎？

4.「耍太極卸膊的人」

「呢單嘢唔係我跟開，呢件事我唔知道喎！」總之大事小事全部唔關佢事，但係就一定會講出大堆人名，說明工作關阿邊個邊個事。為何這種人反而能在職場生存？Sorry囉少年你太年輕了，唔做唔錯少做少錯，單憑這點就長命過你同我！

5.「自作聰明的人」

呢種人的確可以累街坊！唔明又唔問，問咗又唔聽，聽咗又唔做，做咗又做錯，錯咗又唔認，結果齊齊孭鑊，主角甚至覺得自己好無辜，只是團隊同事全部都蠢唔夠聰明，問你死未？我在職場上見過不少，讀者呢？

6.「情緒化的人」

今時今日，我同大家講「發脾氣是本能，壓得住不發是本事」，會不會被視為教人忍氣吞聲做鵪鶉？還是杜月笙講得好：「一等人，有本事，沒脾氣；二等人，有本事，有脾氣；末等人，沒本事，大脾氣」。如果我再講「忍人之所不能忍，方能為人所不能為」，有冇人肯聽？

7. 「過於政治謀略的人」

好似宮廷戲一樣勾心鬥角、機關算盡、步步為營，想起都感到辛苦！別說辦公室多政治，其實無論何處，只要有人就都離不開政治。雄才偉略一樣是謀略，只是凡事過猶不及，過了頭就是私欲大於一切。遇着這種人，不想被計算利用，奉勸大家，避之則吉。

延伸閱讀：失業率高企必定難搵工？被裁員不一定是壞事 做義工反而可重新出發？｜張慧敏Son姐

延伸閱讀：中年失業搵唔到工 應自己負全責！拒絕跟時代進步只會被淘汰 改變心態才有活路｜張慧敏Son姐

作者簡介：張慧敏（Son姐）橫跨五世代，馳騁幾十年。天堂未曾上，人間不斷闖，地獄忙折返。魔鬼教練，不是浪得虛名，在公企業顧問獵頭人，在私是辣媽CEO。一雙慧眼，閱人無數；一張寸嘴，不平則鳴；一支辣筆，有的放矢。有問有答，言必由衷。