何鴻燊十大經典語錄｜一代賭王奪賭牌曾飽受威脅「買定棺材」：你嚇我唔到
撰文：經一編輯部｜圖片：新傳媒編輯部
手執10元在澳門由低做起
何鴻燊是何東家族之後，是何東的弟弟何福的孫子，曾因戰亂而要中途輟學，以難民身份逃難到澳門。何鴻燊從前接受訪問時，曾分享自己由拿著10元開始工作，一步步在澳門由低做起，建立他的博彩業王國。何鴻燊曾接受電視專訪，亦以自己的經歷勉勵年輕人：
「我唔信你哋無機會，上帝好公平，只要你勤力發奮，總有個機會輪到你，機會到時，你要識得把握。」
那次的專訪，他談到他自己的堅持不懈的人生哲理，從不認輸：「個輸字我好少肯接受」，又說：
「我一生人唔聽個No字，一定要搞到Yes為止。」
競投賭博專利飽受威脅：你嚇我唔到
他談到1961年競投賭博專利，當時飽受威脅：「當時啲報道就好緊張，因為啲舊人始終唔肯放手，『邊有咁簡單啊，我哋喺葡萄牙咁大勢力，喺澳門又咁大勢力 ，咁簡單咁就放手畀你何鴻燊？無得傾！』。」
他憶述，有人對他說：「你『因住』，你堅持一定要開嘅話呢，你買定棺材都得啦。」但何鴻燊沒有退讓，並回應：
「當時我話，放心啦，第二個講我聽，我會考慮。你講啊，無客氣啦，你嚇我唔到㗎啦！呢次呢，全港各港澳啲報道就賣晒出嚟，咁我都要顧面㗎，無法子唔開，一定要開。」
賭王何鴻燊：你無法子同賭場賭
賭王如他，誰想到他竟然曾經說過「我一生人對賭博無咩興趣」？事實上，他亦曾勸勉大家不要沉迷賭博，「賭博無可否認係好吸引，一直都勸人，賭博當是玩耍、娛樂，千祈唔好過份賭，過份賭未必有得贏，因為我係抽水嘅，但啲人唔聽嘅，『唔得，我係要贏燊哥』。」他直說：
「你無法子同賭場賭㗎，因為我哋係抽水（抽佣）㗎嘛。」
相關文章：賭王何鴻燊逝世 刺激「何家股份」齊升 信德大升23.4% 澳博升至1個月高位
何鴻燊談事業
澳門賭權開放重發賭牌
2001年，何鴻燊被問到澳門賭權開放重發賭牌時，曾以金句回應，非常自信：
「最有經驗係我，邊個有本事淘汰我？我開賭場等於印銀紙咁，日日印銀紙。」
有指霍英東說賭王對澳門無貢獻？
前全國政協副主席霍英東，曾經是何鴻燊的生意夥伴。2002年，曾有指霍英東豪言：「冇我，所有澳門一切都係假嘅！包括何鴻燊！」事後，何鴻燊接受傳媒訪問時，表示不相信霍會發表相關言論：
「如果話我對澳門冇貢獻，就係笑話啦！」
金沙裁員4,000人
2008年，賭場勁敵金沙裁員4,000人，何鴻燊對此表示：
「金沙咁驕傲，驕者必敗，呢次乜嘢架都丟清。」
何鴻燊談生活
2007年直腸壁受傷入院
2007年4月，何鴻燊因為直腸壁受傷入院，外界一度猜度是否患上癌症。後來，何鴻燊親自開記者會闢謠，指自己與四太到泰國旅行期間便秘，當地醫護人員灌腸通便時誤傷其腸壁，又仔細形容通便過程，「（護士）一隻手指好似三隻咁粗，乜都唔搽就隊入嚟。」他當時笑言：
「得咗全世界最邋遢嘅病。」
82歲大壽的願望
2003年，何鴻燊82歲大壽時，公開講過他的生日願望：
「我希望長壽啲，唔使150歲啦，120歲到殺。」
