被裁員冇Reference Letter會影響搵工？職場上無處不相逢 最緊要識做事加識做人｜張慧敏Son姐
撰文：張慧敏（Son姐）｜圖片：unsplash
冇Reference Letter點算好？
反而應該做好心理準備，好景不會永遠常在，舒適圈根本不存在，只有保持警覺做足防備保護，才能保住生存機會。
之前已經詳細講過，今時今日reference letter根本冇作用，有幾多職級值得人事部大費周章做reference check？想當年我做獵頭的黃金年代，即使獵的是C級、MD級人馬，真正要做reference check的，一隻手用唔曬。
所以當有讀者不斷send message問我，被離職裁員，公司不肯出reference letter點算？即使肯出，寫明是被裁員的話，又怕影響之後找工作機會。同人事部講數爭拗到面紅耳赤，最擔心離職之後俾人講說話，留低滿身牙齒印，擺明同自己過唔去，何必又何苦？
不知好嬲定好笑，有人事部願意出reference letter指員工離職，但員工依然對結果不滿，只因公司拒絕刪改員工被裁員的內部記錄。其實公司願意出一份保住員工面子的離職信，已算是非常flexible及體貼，怎麼可能要求公司及人事部做假記錄？
在此重申，根據私隱條例，任何公司未得員工書面同意，不可以私底下要求舊僱主提供任何關於之前工作的資料。即使舊僱主願意提供，亦只能告知離職原因、最後薪金及職位，之前的工作表現如何、Appraisal寫得幾好或者不好也好，全部不能向第三者披露。
如果要做reference check，諮詢人姓名及聯絡方法只會由員工提供。所以如果大家很在意有機會被reference check的話，緊記好來不如好去這個宗旨。
還有，即使不能多個朋友，都要盡量避免多個仇人。世界真細小，無處不相逢。
如果未來上司與舊公司同事相識，以上所講則全部不成立。因為朋友之間打個電話一問就一清二楚，求職者以為十拿九穩，到最後關頭落馬都不知道背後發生了什麼事。所以我經常奉勸大家，不要在自己的職途上埋地雷，隨時炸死自己還要自以為無辜。
最後提提大家，如果真的需要reference letter，可以由任何與自己共事過的人寫，並不需要由公司發出。所以幾時都話，識做事還要識做人，你點對人人點對你。平時只管掃好門前雪，懶理其他人死活，有事相求時就不知道可以向誰開口尋求幫助。
延伸閱讀：員工證拍唔卡到先知畀人炒？公司裁員手法差劣 別將員工用完即棄｜張慧敏Son姐
作者簡介：張慧敏（Son姐）橫跨五世代，馳騁幾十年。天堂未曾上，人間不斷闖，地獄忙折返。魔鬼教練，不是浪得虛名，在公企業顧問獵頭人，在私是辣媽CEO。一雙慧眼，閱人無數；一張寸嘴，不平則鳴；一支辣筆，有的放矢。有問有答，言必由衷。
