員工證拍唔卡到先知畀人炒？公司裁員手法差劣 別將員工用完即棄｜張慧敏Son姐

撰文：張慧敏（Son姐）｜圖片：unsplash

說起來，97年金融風暴至今香港已經歷過好幾次裁員潮，所以講到處理裁員問題，這些年來見慣風浪的大小企業僱主人事部，即使未至於駕輕就熟，都應該懂得如何處理。但擺在眼前的事實是，最近公司的裁員手法「沒有最差，只有更差」，把員工當作貨物用完即棄，我實在看不過眼。

又不是犯了法，有必要即捕即解嗎？跨國企業大銀行，員工返工發現職員咭失靈，以為只需去人事部補辦補發。去到人事部見到人頭湧湧才知道是失效，因為個個排隊攞大信封，然後返埋位執嘢返屋企。其後發展到冇得返埋位執嘢，所有物品是私人還是公司財產，由公司決定，打包之後速遞到員工府上。

不過最低限度，以上方法都有當面交代清楚，大信封內亦有清楚列明薪金及各樣補償（如果有的話）計算方法及金額。起碼有根有據，大家有數得計。

但有其他公司，打個電話通知完就算。員工突如其來收到電話才知自己被裁員，可以有幾難受難過驚恐驚惶，不用問都知。

僱主和僱員之間的關係，直白一點講可以是買賣，講好條件，一個願買一個願賣，其實是交易，並沒有高低之分。

僱主不是高高在上，求才若渴有工冇人做的日子，並不是很久遠的事。世界真細小，山水有相逢，好來不如好去，放諸四海而皆準。

公司要裁員，員工無話可說亦冇反抗或拒絕接受的權利。但員工是人不是貨物，不是用完即棄及唔該都唔使講句的。人與人之間最基本的尊重，對員工應有的交代，是任何公司、企業，不論大小規模，都必須要負的責任。裁員是公事公辦，又不是私人恩怨情仇，站出來大大方方向員工宣布就可，為什麼做得如此小家小氣閃縮，做法甚至極盡侮辱羞辱？

其實公司經營狀況如何，員工不可能心中冇數。只不過在經濟低迷的情況之下，要搵新工談何容易，只能帶着忐忑惶恐的心情，做得一日得一日，等候公司發落。不過即使公司財政穩健，藉機重整架構換血，甚至進行大規模的種族清洗，都不是什麼稀奇事。既然理由冠冕堂皇，就不要做得肉肉酸酸。

人有人格，公司有公司格，明明有得揀有型有格，何必偏要做得賤賤格格？

延伸閱讀：升職「加辛不加薪」可否拒絕？放棄機會隨時將努力一鋪清袋！｜張慧敏Son姐

延伸閱讀：認真就輸了？職場錯誤未必有得補救 差之毫釐都可能謬以千里！｜張慧敏Son姐

延伸閱讀：與同事太Friend都唔得？記住職場「7不做」 免犯無謂錯誤影響前途｜張慧敏Son姐

作者簡介：張慧敏（Son姐）橫跨五世代，馳騁幾十年。天堂未曾上，人間不斷闖，地獄忙折返。魔鬼教練，不是浪得虛名，在公企業顧問獵頭人，在私是辣媽CEO。一雙慧眼，閱人無數；一張寸嘴，不平則鳴；一支辣筆，有的放矢。有問有答，言必由衷。