炒家唔肯平賣？用家自住難劈價？專家教你分析炒家、用家、投資者減價心態｜1％ Anthony
筆者： 點解呢？
朋友： 佢話業主係資深炒家，好多樓，唔會肯平賣。
筆者： 唔係喎，貨多嘅炒家仲易劈喎，用家反而仲難。
撰文：1%Anthony (第一桶金)｜圖片：unsplash
論3個身份劈價難度
很多人都以為投資者、炒家有實力，難傾價。
其實有實力唔代表唔會平賣，因為他們手上持貨多，只要有足夠誘因，例如急要資金，例如有更好機會，平賣一兩個單位，濕濕碎！相反用家只有一個單位，更難轉身。以我自己為例，三個身份我都曾經做過，可以分享一下當中的心路歷程。
1. 炒家：短線投機者
過去十年政府不斷加辣，現在樓市基本上已沒有炒家。如果有炒家的話，以現時的經濟環境，應該跌到反艇！
所謂炒家，可以理解為短線投機者，策略是短線獲利，有幾短？一年、半年、幾個月、幾天…甚至一天！十年前辣招推出之前，很多摸貨短炒，年青朋友未必知道，即是在物業成交之前，已經轉手獲利。高峰期1997年，甚至有成交之前，已經轉手幾次的情況，當然，由於時間很短，所以賺幅未必很多，通常一、兩成已滿足。
由於炒家的策略是「密食當三番」，所以貨量比較多，同一時間就炒幾間，每間放低一成訂金就炒，升一成就賺一倍。
亦因為貨量多，萬一遇上逆境「走鬼走唔切」，就會面臨財困，所以很多時會不惜壯士斷臂，不惜急走、蝕讓，所以在淡市比較容易劈價。
在旺市劈價亦不難，因為炒家不求賺得多，只求快靚正，因為很多炒家根本冇足夠資金成交上會，只是一成訂金炒一轉，所謂「十個煲得九個蓋」，有合理利潤就走，不難纏。
2. 投資者：長線收租者
他們買樓的目的是長線收租，短期升跌未必吸引到他們賣樓。
以前沒有辣招的時候，我們做長線投資，根本就不需要賣樓，只需要定期加按，套現做首期再買就可以，所謂儲樓的年代，除非利潤可觀或者睇中其他靚貨想買，否則不會隨便賤賣資產，尤其旺市時。
淡市時反而有機會偷雞劈價，始終人有三衰六旺，經濟差，或者因為其他投資會損手，或者因為想套現防身抵抗逆境，部份會平賣！例如手上有10層樓，可能會賣走2間套現，以備不時之需，或者預備在低位撈貨。
長線投資者嘛，持貨時間長，升幅也多，例如10年前100多萬買回來，現在5、600萬了，劈幾十萬只係「面嗰浸」，其中2間賺少啲有乜所謂，另外8間賺番就得，劈到價機會大。
延伸閱讀：疫情打擊經濟應否撈底買樓？諗清楚自住定投資 只可投資不應投機！｜1% Anthony
3. 用家：只有一層自住物業
這是最難劈價的，大部份人對樓的買賣，基本上沒有甚麼概念，經常想着…賣咗住邊？賣咗買番咪又係一樣？最重要是他們手上只有一層物業，食粥食飯都係睇佢，所以賺少咗，有如在他身上割一大片肉，很痛很痛，無端端唔會平賣。
即使樓價跌，亦只會跟你說，我自己住，升升跌跌又乜所謂丫，所以比較難劈。
除非兩種情況，第一是他們想換樓，可能人多了唔夠住，因為他們需要資金買另一層樓，適逢跌市，諗住平賣平買都有着數，就會肯減價。又或者他們經驗淺，心理質素低，見到經濟差，樓市股市都跌到反艇，會被市場震出來，如果樓價已經升了很多，劈價更易！
