「我冇口罩用？我整！」補習名師K Kwong研發HK Mask 7日即製成原型：自己香港自己救
他沒有公司、人手或廠房，但這位化學名師有想法，亦有號召力。提供濾芯的公司FOCUS和製作布口罩的社企裳樂匯坊裡，都有他的學生；舉辦HK Mask記招的6位數字開支，任職公關公司的舊生著K Kwong不用急著找數，30年前的舊生主動提出免費為HK Mask開網站。他一直相信：「做嘅嘢如果係啱嘅話，就唔會單獨，你唔會係唯一一個人。」
撰文：經一編輯部 ｜ 圖片：新傳媒編輯室
同時用3部電話、不賺分毫：而家係我人生最忙嘅日子
自從HK Mask面世後，他的日程便擠得密密麻麻，忙得不可開交，第一次與K Kwong通電話商量訪問安排，是晚上11時。現時，他同時使用3部電話，分別處理私人事務、聯絡傳媒和處理造口罩事宜，他說：
而家係我人生最忙嘅日子，係忙過我以前補習好多。但係我仍然覺得開心，因為我覺得幫到香港人，我甘心。
他是造口罩計劃的牽頭者，卻不賺分毫，所有盈利和發售事宜都歸他的合作夥伴決定；不為錢而牽頭完成的事，亦絕非業餘水平：「我可以好大膽講，呢個口罩由外行人砌咗個熱潮出嚟，完全係有Bussiness Model，砌之前我係深思熟慮。」
相關文章：香港確診肺炎個案及死亡人數、家居檢疫隔離大廈名單、患者曾乘搭交通及所到地方
最初只因屋企唔夠口罩：大鑊！我要即刻整！
K Kwong在別人眼中看似偉大，他卻笑說：
「我唔係偉大到想幫其他人，只係因為我屋企冇口罩，我成個彈起。我無口罩，我要整！即刻要整！」
早於去年年底傳出武漢有確診個案時，他沒想過竟然要自己口罩自己造：「因為我無諗過會咁大鑊。唔夠口罩？去外國買咪得囉。」直到1月，有心人打算在港設口罩廠，K Kwong即幫忙四處打聽機器和原材料來源。然而，他發現即使購得口罩機，亦難買到口罩原料。2月初，他驚覺家中剩下不足40個口罩，自己、太太連同菲傭只餘10多日的用量：「大鑊！」他意識到與其依賴進口的機器和原料，或繼續等外國口罩到貨，倒不如自己造口罩：「我要改變計劃。」
由零開始研發口罩 7日內製成原型：自己香港自己救
當K Kwong不夠口罩時，學生、朋友從四方八面送來口罩，「佢哋覺得你唔可以冇，要企係度，幫我哋做其他嘢，我好感動，我覺得香港係需要有啲人企出嚟做返啲嘢——Connect。」
於是，2月9日，他在Facebook刊登貼文，招募義工造口罩，自己香港自己救，結果一呼百應。兩、三日後，他們開始設計口罩外形，K Kwong要求設計必須使所有呼吸的空氣都經過口罩濾芯：「2點鐘開始，我哋5點就要做到呢個口罩！」一小時後，他們在4、5個設計中再挑選出一個作改良；兩小時後，便完成布口罩的設計。
翌日，他便拿著布口罩與本地公司FOCUS洽談合作：「唔夠時間，我哋要做多啲口罩救香港人，我哋一齊做。」他們是售賣空氣清新機、冷氣濾網的公司，最初亦對提議半信半疑，K Kwong解釋DIY口罩的商機，又將濾芯放入布口罩示範，最終成功說服他們合作，HK Mask的雛形就此誕生。當政府2月中成立防疫基金，至今仍未有製成的口罩送到市民手上，但K Kwong用7日便已經成功研發第一個HK Mask。K Kwong便聯絡相熟傳媒，準備於周末介紹成品，此舉亦為鼓勵車口罩的義工，讓他們看到成果：「你哋要做嘅就係畀足心機，嚟緊車多啲口罩。」
之後，他決意花費再辦記招，讓更多人認識HK Mask。之後的星期一，K Kwong便立即聯絡在公關公司工作的舊生：「幾多錢唔好理住，總之你同我做，錢我第日還，一定有方法清。呢個嘢係可以賺到錢嘅，唔係我賺，但係我一定要proceed。」公關不解，DIY口罩多的是，這個HK Mask有何特別？K Kwong只說：「到時你就知，畀啲信心我。」記者會前，他特地找濾芯公司測試紙巾的過濾效能，對方亦不知他有何打算。結果，記者會成功吸引多間傳媒採訪、直播，HK Mask配以紙巾濾芯達N95七成效果，更成報道的焦點之一。
相關文章：武漢肺炎全球疫情、確診人數即時｜不斷更新
免費下載紙樣、不申專利Open Source
HK Mask特別還在於免費開放下載紙樣，只要你有布和針線，便可自己動手做口罩。口罩可用熨斗消毒重用，買不到濾芯可用紙巾代替；K Kwong竟沒有以自己名義申請HK Mask的專利：
所有想參與嘅人，都可以隨便去改良佢。任何發明只要開放俾人搞佢，就會繼續進步。
不怕他朝有人抄襲設計後告自己侵權嗎？他怕，所以他腦海裡早有HK Mask 3.0的設計，他日有需要才將其實現。
預視疫情退卻以後再無用處？
不過，任HK Mask再特別，只要疫情一過，很快就會被忘記吧？為此，他亦早有打算。當時他請公關安排日語翻譯出席記者會：「全世界邊啲國家無事無幹都會戴口罩？其中一個就係日本，春天嘅時候花粉症流行會戴口罩。呢個（HK Mask）會變咗時裝，只要跟住去做就會成功。口罩可以係時裝。」
記招6位數開支不用急著找數：唔好講呢啲，第日先
凡事兩手準備，連記者會的翻譯、公關公司亦有後備。
我所有嘢都duplicate，有Plan B，有咩事有第二隊人補上。
然而，當他們公佈下載口罩紙樣的連結時，卻始料不及，連結被惡意舉報至失效。幸而，各路熱心網民將紙樣廣傳，亦有位30年前的補習學生隨即主動聯絡K Kwong，為HK Mask開設網站：「阿Sir，我幫你整好個網站，原本我哋要做呢堆嘢要3星期，啲資料畀哂我幫你整上去，就無人攻擊到你。」
補習30年教過無數學生，所建立的人脈關係相當重要：「佢哋尊重我係好重要。如果我只係一個普通補習老師搏命賺錢，佢未必咁尊重我。」就如，記招後他追問公關舊生花費多少，對方說6位數，說罷竟叫K Kwong不用急著找數：「唏，唔好講呢啲嘢，阿Sir唔好理啦，第日先。」
DIY口罩能成事，在於K Kwong有想法，亦在他的號召力。
香港有好多人想造口罩，但係無信心。我希望將呢啲人連埋一齊，就係我做嘅嘢。
唔好覺得無可能：7日造個口罩有幾難？
當有人質疑，補習老師造口罩，邊得？他便說：「開波就話無可能就無可能啦。點解有個口罩先？一定係有人做㗎嘛，唔係個天跌落嚟，點解你唔可以做造嗰個人呢？」記者問：「咁其實你做咩都得？」他答得招積：
其實啲係得㗎。有足夠嘅人、時間，7日造個口罩有幾難？
他相信世上無難事，敢想敢做才有可能：「唔去諗嘅話，社會永遠唔會進步。」
K Kwong教學多年，他的號召力促成HK Mask的誕生。舉辦記招的6位數字開支，舊生著他不用急著找數；30年前的舊生願意免費為HK Mask開網站。這位時常穿著攝影背心的化學名師，說自己的最叻是攝影不是補習和讀書；他自命招積，從來不是安份守己的讀書人：「其實我係好曳嘅讀書人。」究竟這位補習老師有何獨特，為何號召力如此大？後文再續。
