【診所職場事｜寶豬趣聞】喺診所播佛經嘅女士｜珍寶豬

有位姨姨入到嚟診所，望望四周，邊行埋嚟登記處邊問：「開咗工㗎啦？」
我：「睇醫生嘅麻煩俾身份證我登記呀！」
佢：「你呢間冇人睇嘅？」
我：「今日比較靜啫！」
佢好懷疑：「咁奇怪…」

撰文：珍寶豬（funnyclinic）｜圖片：電視截圖

女士嫌診所太安靜

我：「你係咪睇醫生呀？你俾身份證我登記呀」
佢交出身份證：「嗯」
登記完成，我：「你坐低等等呀，轉頭會嗌你名就可以入去見醫生㗎啦！」
佢邊行去坐低邊望望診所四周。
坐坐吓，佢喺位度大嗌：「姑娘呀，呢度好靜呀，可唔可以開電視呀？」
你見到有電視嗎？
我：「我哋冇電視㗎喎」

佢：「靜到成間靈堂咁，你求其播啲嘢啦，我想有啲聲呀！」
一係你唱首歌嚟聽吓呀？
我：「你好快入得去見醫生㗎啦！」
佢邊講邊拎自己部電話出嚟：「你唔播我自己播啦唉！」
一分鐘都冇，診所好似更加似…阿姨呀，你可唔可以唔好播佛經呀？
呢個時候，醫生話可以嗌姨姨入去，我：「姨姨呀，可以推門入去見醫生啦」
阿姨拎住部電話行入房，好似冇意欲閂聲咁…
我：「你閂咗聲先入房啦，播住歌嘅會影響到醫生診症㗎」
佢唔理我，將電話放喺胸前，照播住歌咁行入房：「唔熄呀！」
一陣醫生要聽你個肺嗰陣，應該會聽到好立體嘅佛經…

延伸閱讀：想要「過時」病假紙嘅先生｜珍寶豬

延伸閱讀：自備儀器做大腸鏡嘅女士｜珍寶豬