【診所職場事｜寶豬趣聞】撕爛病假紙嘅先生｜珍寶豬

佢行埋嚟登記處放低張病假紙：「整多兩日呀」
我望望佢張病假紙，咦，早幾日啦喎。

撰文：珍寶豬（funnyclinic）｜圖片：電視截圖

先生要診所開多幾日病假

於是我睇睇紀錄：「先生，唔好意思，你早幾日嚟睇醫生，醫生都係開咗一日病假俾你，你而家先嚟話要寫多兩日嘅話，醫生係寫唔到俾你」
佢：「你個醫生同我講過有唔舒服可以再返嚟呀！」
你平時閱讀理解會唔會係拎好低分呀？
我：「醫生意思應該係你放完呢一日病假，都仲係見唔舒服就第二日再過嚟！」
佢：「佢嗰日冇咁同我講喎！」
我：「因為病假紙係要你親自過咗嚟先可以寫嘅，你而家過咗幾日先過嚟話要返之前嘅日子係唔得呀，如果我哋寫俾你嘅話會係虛假文書，犯法嘅！」

佢：「呢張嘢會犯法？你大我呀？」
我：「係真嘅，你可以上網睇睇呀！」
佢：「寫多兩日又唔係寫多兩年？犯咗咩呀？我公司有病假拎㗎，合法合情合理！」
我：「或者我咁解釋你知，你有病假紙去放病假係病假，你冇病假紙去自己放病假，如果你公司一定要病假紙先去放病假嘅話，而你又提供唔到病假紙就係曠工。所以你放病假一定要拎咗病假紙先可以放，唔可以你拎住一日病假紙就自己放自己三日病假，明唔明呀？」
佢：「我都唔明你講乜，我要多兩日啫，又唔係兩年。」
偷一蚊同偷一萬蚊都一樣係偷，你明唔明呀？
我：「我哋冇得寫返之前嘅病假俾你㗎！」

佢：「你收咗我錢？嗌你做少少嘢都托手踭？」
最多我叫醫生畫個心俾你呀？加多枝箭穿住佢好冇？
我：「真係唔好意思呀先生，因為係犯法嘅我哋幫唔到你！」
佢：「犯法又點喎，你診所嚟㗎嘛，醫生嚟㗎嘛，犯法關你咩事啫！」
…醫生唔怕俾人拉嘅咩？醫生你入咗個無法無天結界咩？
我：「唔好意思先生，我哋真係唔做犯法嘅嘢！」
佢：「妖，講嚟講去都係得呢句！」
佢當住我面撕爛咗張病假紙：「而家我唔要呀！」佢好有型咁離開咗診所。
第二日，電話響起。
一把男聲：「姑娘，我噚日爛咗嗰張假紙可唔可以寫返俾我呀？」
做咩啫你？型就要型到尾呀嘛！

延伸閱讀：拎底褲嚟睇醫生嘅小姐｜珍寶豬

延伸閱讀：以為自己好靚仔嘅先生｜珍寶豬