【診所職場事｜寶豬趣聞】以為自己好靚仔嘅先生｜珍寶豬

我：「你好，乜乜診所」
對方係一位先生：「喂？診所？我一陣嚟睇醫生呀！」
嘟⋯⋯佢CUT咗我線，即係點呀？

撰文：珍寶豬（funnyclinic）｜圖片：電視截圖

先生叫姑娘認住佢嘅靚仔樣

過咗大概個半鐘，有位先生行埋嚟登記處：「仲未到我嘅？」
你好生面口喎？
我：「先生，你係咩名呀？我幫你睇睇呀～」
佢：「乜乜乜。」
我望望排隊名單：「你係幾時登記呀？我唔見有你紀錄嘅？」
佢：「頭先咪打過嚟話我嚟囉！」
咦，你就係CUT我線嗰位呀？
我：「頭先係你講完要嚟睇醫生就CUT咗我線，我冇同你登記㗎，你咩資料都冇俾我嘛，而且冇電話預約啊，個個嚟到都係行埋嚟登記先再等見醫生～你而家登記返啦，身份證號碼係？」

佢：「你唔講我知？我坐咗喺嗰邊等咗好耐啦」
我：「診所咁多人喺度等緊又出出入入，我唔會留意到你係咪未登記㗎，有啲入嚟陪人等嘅都係就咁坐低㗎咋！」
佢：「你認住我呀嘛！我咁靚仔都唔望多兩眼！」
我望多佢兩眼，唔覺得係靚仔，完，都係低頭望返黑黑的鍵盤好過。
我：「咁我而家同你登記返先啦，你身分證號碼係幾多？」
佢：「XXXXXXXX」
我：「登記咗㗎啦，你排第八個呀！」
佢：「你以後認住我呀！知唔知呀？你認住我個靚仔樣呀！吓？」
我以後一定認得你記得你啦，唔係因為你靚仔，係因為你唔知醜以為自己好靚仔…

延伸閱讀：想拎男仔藥嘅先生｜珍寶豬

延伸閱讀：拎底褲嚟睇醫生嘅小姐｜珍寶豬