【診所職場事｜寶豬趣聞】想拎男仔藥嘅先生｜珍寶豬

佢行埋嚟登記處問：「姑娘小姐，請問你哋嘅醫生係男醫生定女醫生呀？」
我：「男醫生嚟～」
佢：「咁實在太好啦，你可唔可以幫我講聲我想拎啲男仔藥呀？我唔駛見醫生呀！」

撰文：珍寶豬（funnyclinic）｜圖片：電視截圖

先生想拎啲「男仔藥」

我：「你之前有冇喺度睇過？我同你睇睇排版先呀」
佢揮動雙手：「冇呀，我唔係有咩病呀，我想拎啲男仔藥咋！」
我哋實知你所講嘅『男仔藥』係咩啦～
我：「你要藥嘅話都係要見醫生㗎，你俾身份證我登記呀，我同你登記呀」
佢先係沉默咗一陣。
我：「先生？你係咪要睇醫生呀？」
佢：「醫生一定要見我嘅理由係咩呀？想當面笑我？」

…你個人諗嘢諗到咁壞壞嘅～
我：「親自見你係想了解清楚你情況啫」
佢：「我講句『男仔有事』就已經代表晒啦」
我：「醫生未必清楚知道你講嘅係咩事嘛，與其我同你傳話，不如你直接入去見醫生啦，兜口兜面問都直接啲嘛！」
佢：「我唔知醫生咁樣有咩居心，醫者父母心嘅話都應該要企喺我唔想入去見醫生嘅立場諗吓，我就鐵定不入㗎啦！」
我：「…咁你拎唔到藥㗎喎！」
佢：「你講真？」
我：「係呀，醫生一定要睇咗你先會開藥俾你！」
佢：「你同對面嗰間一樣，都係掛個假牌出嚟呃我！醫者父母心都係呃人！」
佢抬頭望望，搖頭嘆氣離開咗診所。

我望望佢望嘅方向，先生，你係咪唔識字呀？個牌匾寫住嘅唔係『醫者父母心』喎。

延伸閱讀：罵姑娘篤背脊嘅先生｜珍寶豬

延伸閱讀：拎底褲嚟睇醫生嘅小姐｜珍寶豬