【診所職場事｜寶豬趣聞】竹昇妹病人｜珍寶豬
佢行埋嚟登記處唔出聲，純粹得個望字～
我開口問：「請問係咪睇醫生呀？」
佢好冷淡回應：「Whatever啦」
撰文：珍寶豬（funnyclinic）｜圖片：電視截圖
竹昇妹病人嚟診所睇醫生
Hi auntie，我問你係咪睇醫生，你答yes就入房，答no就門口嗰邊，答whatever係咪死埋一二邊呀？
我：「你要睇嘅話我同你登記呀，麻煩你俾身份證我呀」
佢轉個圈指指等緊睇醫生啲人：「佢哋都係？」
我：「佢哋都係等睇醫生嘅，如果係而家登記就係排第六個，一個鐘內都可以睇完走得㗎啦」
佢『WOOO～』咗一聲。
佢拉低佢副太陽眼鏡，哄埋啲告示度望咗一輪，陰公，有老花嘅。
佢行埋嚟再同我講：「May I check in？」
有冇英文老師教吓佢呀？我唔識英文都頂佢唔順啦。
我：「麻煩你身份證呀」
佢拎出身分證，我登記時問佢：「過往有冇藥物敏感？」
佢：「I don’t care」
我care醫生個牌呀，你食完有咩事入醫生數嘅話，我分分鐘失業㗎。
我：「你以前食藥有冇試過對邊隻藥敏感呀？例如食完會出疹或者覺得唔舒服？」
佢：「冇喎」
咁正正經經答我咪好囉。
我：「即係過往冇藥物敏感，好嘅，同你登記咗㗎啦，你可以坐坐先，排第六呀」
佢『嗯』一聲就行去坐低。
過咗陣，佢又行埋嚟問我：「頭先你問我啲咩呀？」
我諗咗諗，係咪你有幻聽呀，我冇同你講嘢啊：「我冇嗌你呀？」
佢：「你頭先唔係問我對啲藥有咩feeling咩？」
….好唔好feel呀？
我：「…你應該係講我頭先同你登記嗰陣，我問你過往有冇藥物敏感，你頭先答咗我話冇呀」
佢：「敏感會點㗎？」
我：「有啲人會出疹，會痕會腫，有啲嚴重啲嘅會抖唔到氣，你冇試過咁呀嘛？」
佢：「I don’t know，maybe have，maybe ng have」
Ng你老…
我：「你諗清楚啊，都緊要㗎，有就俾個藥名我，我幫你記低。」
佢『嗯～嗯』咗一聲就行開咗。
啲懶係竹昇妹真係好麻煩。
延伸閱讀：幫老公詢問呢種服務嘅姨姨｜珍寶豬
