【診所職場事｜寶豬趣聞】想預先拎定醫生紙 聖誕請病假嘅先生｜珍寶豬

佢行埋嚟登記處向我單單眼～我望住佢，心諗係嚟睇眼有事嗎？
我：「係咪睇醫生？係嘅俾身分證我登記呀」
佢：「係呀，我等緊你開聲呀」

撰文：珍寶豬（funnyclinic）｜圖片：電視截圖

先生搵醫生拎定「聖誕病假」

開咗啦，你撞聾呀？
我：「身份證呀唔該～」
佢：「好呀」佢拎出身份證。
我登記時問佢：「有冇藥物敏感呀？」
佢：「應該就冇㗎啦」
我繼續低頭登記。
佢問：「一陣可唔可以幫我同醫生講幾句好說話呀？」
做咩呀？又一個冧醫生呀？
我：「我？我講嘢醫生唔聽㗎，你有咩自己入房同佢講得㗎啦」
佢又單單眼：「點會呢？我知你哋坐喺度嘅仲惡過醫生」

點解你會用『惡』嚟形容之餘仲要去起勢喺度單眼呢？
我：「唔係啦，你有咩自己同醫生講得啦」
佢：「今個Christmas我有節目呀」
我冇出聲。
佢：「我份工冇得放假，可唔可以搵醫生寫張醫生紙…」
我：「先生你意思係要醫生寫虛假文件去俾你放聖誕假嗎？」
佢：「唔駛咁大聲唔駛咁大聲」
我：「我平時講嘢都係咁嘅，如果你需要放聖誕假你最好係返公司拎假，而唔係嚟診所拎。」
佢：「唔駛咁大聲唔駛咁大聲」
我：「我同你登記好㗎啦，你坐低等嗌名呀」
佢拎返身分證，企圖說服我：「我真係第一次㗎呢」
我話之你係第一次定最後一次呀～

我：「你嘅第一次與我無關，我淨係負責登記㗎咋」
佢：「你可唔可以入去幫我同醫生講呀？講幾句好說話得㗎啦」
係你迫我㗎。
我坐喺度向住醫生房大嗌：「醫生，出面有位先生想叫你寫定聖誕假嘅病假紙俾佢放假呀，佢有節目喎」
我聽到醫生房傳嚟回應：「我都有節目呀」不過先生應該聽唔到。
眼前嘅先生面如死灰，講咗句『八婆』就行埋去坐低。
最後入到醫生房，佢以一分鐘都冇嘅速度出返嚟，再離開診所。
仲有成個幾星期先到聖誕，你咁急拎做咩啫，趕住去⋯⋯

延伸閱讀：無帶身份證嘅先生｜珍寶豬

延伸閱讀：幫老公詢問呢種服務嘅姨姨｜珍寶豬