【診所職場事｜寶豬趣聞】幫老公詢問呢種服務嘅姨姨｜珍寶豬

佢行埋嚟問我:「你哋有冇切包皮呀?」
如果係麵包的話，麻煩去麵包舖自行買去皮方包呀~

撰文：珍寶豬（funnyclinic）｜圖片：電視截圖

姨姨問診所有冇呢種服務

我:「你係幫屋企人問?割包皮屬於手術嚟呀,要轉介去專科」
佢:「梗係幫我老公問啦,我又冇包皮」
我:「有需要嘅話可以叫先生自己嚟睇醫生」
佢:「切咗係咪舉得返起啦?要抖幾耐?」
我彷彿見到面前嘅係一隻好餓嘅老虎。
我:「包皮同不舉應該兩樣嚟喎~佢嚟到睇醫生再問醫生啦,等醫生了解咗佢咩情況先」
佢:「有分別咩?唔係塊皮墮住晒舉唔起咋嘛,我老公咁同我講嘅?」

你老公會唔會係同你講眼皮咋?所以隻眼先擘唔大呀嘛?
我:「佢自己嚟睇醫生同醫生講啦,我哋兩個唔係當事人都討論唔到啲咩出嚟,幫唔到啲咩手」
佢:「我想了解吓啫,又唔一定要睇你哋嘅,出面咁多診所」
你都講到明運桔我仲駛理你嘅?門口嗰邊呀謝謝~
我冇出聲。
佢:「做完要抖幾耐?」
我:「睇咗醫生先,醫生先會答到你,呢啲因人而異,有需要做先會做嘅」
佢:「咩收費呀?」
我:「我哋診金連藥就三百蚊,如果需要轉介信而唔駛醫生開藥嘅,一般都會二百蚊咁上下」
佢:「切包皮呢?」
我:「呢個要等佢去到專科醫生度,由嗰邊答佢啦」

佢:「你咩都唔知嘅?喺度扮?」
係呀,你點知?我而家扮緊條去皮方包呀。
我:「其他診所收費係點,我哋唔會知,到時你先生真係有需要嘅,可以喺睇之前打電話去問咗大約收費先」
佢:「咁確實係幾錢先得?我都要知筆錢駛唔駛得過嘛!」
原來每個人都有一個價係真嘅,包括先生塊皮…
我:「俾醫生睇咗係咪真係有需要先啦,我哋呢度診金都係二百零~」
佢:「講嚟講去都唔講實幾錢!冇嘢啦!出面大把診所!」
佢嬲爆爆走咗。

延伸閱讀：無帶身份證嘅先生｜珍寶豬

延伸閱讀：有病先嚟睇醫生｜珍寶豬