【診所職場事｜寶豬趣聞】有病先嚟睇醫生｜珍寶豬
廣告
有日診所人少少~
有對母女嚟到診所登記,登記後佢哋行去坐低等嗌名。
喺等候期間,有位坐附近嘅小姐可能見小朋友幾得意就搭訕…
撰文：珍寶豬（funnyclinic）｜圖片：電視截圖
小姐搭訕失敗 發脾氣話人無禮貌
小姐問:「妹妹幾歲呀?」
問咗一次,冇人理佢。
小姐唔死心再問:「妹妹,聽唔聽到靚女姐姐同你講嘢呀?」
靚女?邊度有?吓?吓?吓?唔見嘅?
問多一次,都係冇人理佢。
小姐仍然唔死心再問:「妹妹呀,靚女姐姐同你講嘢喎,姐姐問你幾多歲呀?」
我呢刻好希望妹妹會用把粗獷嘅聲音回應佢『關你叉事呀,一定後生過你啦,問!』
但係現實冇。
媽媽見位小姐咁死心不息地煩,就唯有代女回答:「唔好意思,我個女唔舒服,喉嚨痛到唔想講嘢呀!」
小姐覺得不滿:「嚟得個個都唔舒服啦!」
係你唔舒服得嚟寧舍精靈寧舍煩。
媽媽冇出聲。
小姐繼續發嘮叨:「嗌聲姐姐都係禮貌嚟啫,咁細個就已經咁冇禮貌,第日我生個女係咁冇禮貌,我實兜巴星佢!」
有人肯同你生先算啦,你好快啲生啦,再唔生就高齡產婦啦。
到小姐入得去時,我嗌:「乜乜乜小姐,可以入醫生房啦!」
小姐企起身,望望兩母女:「BYEBYE啦妹妹,姐姐入房睇醫生啦,姐姐唔似得你咁冇禮貌呀!」
你係咪食咗過期春藥呀?
我:「小姐,麻煩你唔好騷擾其他病人啦,快啲入去啦」
小姐入房後,媽媽好迷茫咁望住我。
我都好無奈咁同媽媽講:「佢都係有病先需要嚟睇醫生,原諒佢啦,醫生會盡力啦!」
醫生,轉介佢罷啦~
