【診所職場事｜寶豬趣聞】相由心生｜珍寶豬

佢個樣好似好唔滿意咁行埋嚟登記處:「我認得你呀,係你呀!嗰日係你俾呢張嘢我嘛」
佢一嘢『啪』咗張紙喺枱面,我望望張紙係病假紙嚟~
我:「張病假紙寫錯咗?」
佢:「你自己望啦問!你豬嚟咩?」

撰文：珍寶豬（funnyclinic）｜圖片：電視截圖

小姐投訴張病假紙寫錯咗

我:「你俾一俾你身分證我,我望望排版,對返資料呀」
佢:「上面咪有名囉,自己唔識搵咩?」
你都體諒吓我對住醫生手字呀,藥名我哋就話嚟嚟去去都係嗰堆就認得啫,人名呢啲嘢真係好難
逐粒字睇得清呀~
我唯有搵吓當日睇過嘅症,對返個差唔多嘅名:「小姐你電話號碼係咪9XXXXXXX呀?」

佢唔耐煩:「係呀」
我確認清楚病假紙上資料冇錯:「小姐呀,我睇唔到張病假紙有咩問題喎?醫生冇寫錯你名,日期都冇錯呀」
佢:「冇?我嗰日話要三日假!而家爭一日呀!」
我都幾肯定醫生唔會寫三日病假俾你啊。
我:「醫生當日係寫兩日病假俾你」
佢:「我咪講咗話要三日囉,你豬嚟?」
其實你講幾多次我係豬嚟都唔會挑釁到我,因為我返工唔係嚟俾你挑釁到打交,我返工都係為咗可以平安收工逗到份人工。
我:「我可以一陣幫你問吓醫生嘅,你坐坐先呀」
佢用眼尾睥住我,邊講邊行去坐低:「正豬精嚟,唔怪得個樣咁啦,相由心生真係冇錯」

坐喺度等緊睇醫生嘅阿叔:「咁你實係夏娃嗰條蛇啦,飯L頭咁樣」
小姐純粹唔忿氣咁樣坐低咗,竟然冇出聲,可能佢自己都覺得自己係。
…我唔知夏娃條蛇係咩樣,亦唔知飯L頭係咪即係飯鏟頭。
我淨係知小姐最後都係一副死樣咁拎住原本張病假紙離開診所~

延伸閱讀：想要輕工紙的阿姨｜珍寶豬

延伸閱讀：無聊的女士｜珍寶豬