【診所職場事｜寶豬趣聞】想要輕工紙的阿姨｜珍寶豬

佢行埋嚟登記處同我講:「嗌你老頂同我寫張紙呀!」

撰文：珍寶豬（funnyclinic）｜圖片：unsplash

阿姨想免費拎張「輕工紙」

我:「你俾身分證我登記先呀~入到醫生房再同醫生講呀!」
佢:「咩嘢身分證咩嘢登記呀?我要張紙咋嘛!」
俾張A4白紙你,收返你三百蚊好唔好呀?
我:「你要啲咩紙呀?」
佢:「係咪叫輕工紙呀?」
我:「你整親邊度需要寫呢類證明都需要由醫生診斷咗先,所以你都係需要俾身分證我。」
佢一臉疑惑:「個陳太又話就咁寫,唔駛俾錢唔駛見醫生嘅?」
幫陳太寫嗰個好大機會係陳太個老豆,應該得佢老豆先會免費做。

我:「我哋冇啊,一定要見醫生,醫生認為你有需要先會寫！」
佢望望自己雙手:「咁我要整親邊度先可以有呀?我份工淨係坐喺度咋,有時會有啲文件要入吓電腦。」
咁你都仲想輕工?你份工都已經好輕鬆啦喎~
我:「唔係我話俾你知你整親邊度喎,係要你真係整親先可以搵醫生睇吓有冇需要休息寫輕工紙
咋,醫生見到你冇咩嘢都可以唔寫。」
佢:「陳太又話得嘅?」
你問陳太啦,你企喺度成日隊阿陳太出嚟同我講都冇用,我連有冇陳太呢個人都唔知。
我:「我哋就冇啦」
佢:「陳太唔係嚟過寫咩?」
我:「唔好意思呀,我真係唔知你講嘅係邊位」

佢:「哩~高高哋,睇落應該過六十歲嘅呢」
你形容得咁好咁仔細,通緝犯都一定走唔甩啦。
我笑笑:「唔好意思,我真係唔知,不如你去自己問佢啦。」
佢:「我唔識佢喎,上次喺公園聽到佢同人講咋,佢係人定鬼我都唔知。」
…醫生呀,腦殘有冇得寫輕工紙呀?如果得嘅話,可唔可以幫我寫返張呀?或者調我入藥房呀?
我就快俾你啲客激到我腦部細胞全死啦~

延伸閱讀：登記睇醫生｜珍寶豬

延伸閱讀：渴望被關心的小姐｜珍寶豬