【診所職場事｜寶豬趣聞】登記睇醫生｜珍寶豬
廣告
有朝早開工冇耐已經登記到手軟…
正當人龍清咗，排版又拎晒，我可以回回氣時，有位女士行埋嚟…
佢同我講：「我係咪第一個呀？」
撰文：珍寶豬（funnyclinic）｜圖片：unsplash
女士自稱凌晨打咗電話預約
我：「你？你係咩名呀？」
佢：「乜乜乜」
我望望：「冇你呢個名喎，頭先你自己嚟登記定人哋幫你登記呀？」
佢：「我呀」
我：「你俾身分證號碼我呀」
佢：「XXXXXXX」
我：「都係冇喎，第一個唔係你，同埋頭先冇同你登記過喎？我同你登記嗰時
會同你講返你係排第幾嘅，你係排第幾呀？」
佢：「你由頭到尾都冇出過聲，我點知自己係第幾呀」
我：「我而家同你登記啦，你排三十二呀」
佢：「三十二？咁我頭先咁早打嚟做咩呀？」
打嚟…？我哋一朝早冇人聽電話㗎喎。
我：「你頭先幾點打嚟呀？」
佢：「我擘大眼見到係五點幾卦」
我：「…我哋都未開工，又點會有人聽你電話呢？」
佢：「我有講明我登記㗎」
我：「我哋係親自嚟登記嘅，冇電話預約㗎，排第三十二你仲睇唔睇呀？
佢：「唔睇呀！你當我弱智㗎？我打又打咗過嚟，我一擘大眼就打過嚟啦！」
咁門口嗰邊，請，廢話無謂多講。
我冇出聲。
佢再講：「我唔睇呀，我走呀！」
你腳底有AA膠咩？
我都冇出聲。
佢：「俾返我呀！我唔睇呀！我走呀！唔睇你呀！懶有寶，睇其他診所都得㗎
我！」
我：「俾啲咩你呀？」
佢：「身分證呀！我張身分證呀！」
我：「我都冇拎過…」
佢：「你真係當我弱智㗎喎，你唔拎我張身分證點登記呀？」
睇嚟應該唔係當咁簡單啦…
我：「頭先係小姐你講個身分證號碼俾我CHECK返紀錄咋…我冇…」
我都未講完，佢插咀：「我去第二間！」
佢飛快地離開診所。
過咗半個鐘都冇…佢又返嚟。
