【二噁英清潔FAQ】生果仲食唔食得？食水、海鮮受污染？化學博士K Kwong解答催淚彈點處理
撰文：SmartED編輯部｜資料來源：世界衛生組織、環保署、K Kwong｜圖片：中新社、環保署
反修例運動至今，香港警察已發射近萬枚催淚彈，近日有前線記者確診長出「氯痤瘡」，由於「氯痤瘡」是人體積存高濃度二噁英的可確認表徵，因此令人懷疑警方所施放的催淚彈是他攝入二噁英的源頭。
食物及衞生局局長陳肇始今日（11月20日）於立法會回應議員質詢時，強調內部有就催淚彈會否釋出山埃和二噁英作出研究，指暫時未有研究和文獻顯示催淚煙會釋出二噁英，又指催淚彈的燃燒時間短，加上警方多在開放式地區施放催淚煙，氣體很快就會消散，即使催淚煙燃燒期間釋出山埃亦會很快消散。
甚麼是二噁英？
二噁英可自天然途徑釋出，如火山爆發或森林火災，或是工業過程的副產品，例如在治煉、紙漿氯漂白、除草劑的生產過程中產生。
據世界衛生組織網站資料，二噁英對環境有持久性污染力，是一種劇毒物質。全球的環境中都有二噁英存在，它聚積在食物鏈中，主要在動物脂肪組織裡。二噁英一旦進入人體便會長久駐留，因為二噁英具有化學穩定性而且容易被脂肪組織吸收，長期積存於體內，它們在人體體內濃度降至最初一半所需的時間，估計長達7至11年。
如短期內接觸高劑量的二噁英，可能會導致皮膚損害，例如氯痤瘡和皮膚色斑，甚至可能影響肝臟功能；長期接觸會影響免疫系統、發育中的神經系統、內分泌系統，以及生殖功能的損害。世界衛生組織國際癌症研究所將二噁英分類為「已知人類致癌物」。
由於二噁英本身就普遍存在於環境之中，因此所有人的身體裏都有一定程度的二噁英，正常的環境接觸過不會影響人類健康。
有些人會較易受二噁英影響致健康問題，如發育中的胎兒對二噁英則最敏感，新生嬰兒的器官系統正處於迅速發育的階段，也會較易受到影響。
目前香港的二噁英濃度是多少？
環保署於11月19日公佈10月份的二噁英濃度數據，在中西區和荃灣區的空氣中二噁英濃度數值未有上升，其中中西區10月和9月的數據相同，荃灣的數據則錄得每立方米0.011皮克，比上一個月的0.025皮克為少。然而，環保署每月只會採樣量度兩天的數據，地區為中西區和荃灣區。
【K Kwong 解答：催淚彈 FAQ 常見問題】
Q1: 如何清洗皮膚上的CS / 二噁英？
（所謂清洗，即洗走帶有CS / 二噁英嘅塵粒，以下各題類同）
K: 用水+番梘沖洗10-15分鐘
Q2: 用咩番梘？梘液得唔得？
K: 最普通嗰啲番梘已得，梘液都得，冇所謂（唔用酒精，唔用BB油）
Q3: 如何清洗個人衣物上的CS / 二噁英？
K:
- 嚴重污染（超濃味，一索件衫就咳）：棄置
- 少量污染嘅衫：
Step 1 如果見到粉末就先用黐塵紙轆
Step 2 用流水沖洗（勿用高壓水以免濺起受污染粒子）
Step 3 獨立用洗衣機洗（勿溝其他非污染衣物，用普能洗衣粉就得）
Step 4 洗衣機空機再洗一次 - 少量污染嘅鞋，袋：
戴手套，濕紙巾抹表面，之後再用流水沖洗
相關文章：【二噁英催淚彈清潔方法】 皮膚、衣物、家居正確清潔方法 附中醫推介湯水
Q4: 邊種濕紙巾？
K: 最普通嗰啲，只有水份（有啲有少少清潔劑ok），最好無其他成份如酒精。
Q5: 如何應對住所外有催淚彈？
K: 關窗，黐膠纸等，勿用明火煮食。放心，唔會咁易焗死，因為你出入都開門有新鮮空氣。
Q6: 如何清洗家居內 (或學校內) CS / 二噁英？
K: 開窗，戴手套，用濕紙巾抹，再用洗潔精加水抹多次
（勿用吸塵機，因排氣時會將污染粒子吹到更多地方；勿用漂白水，因會出含氯有機物，更毒）
Q7: 經過受催淚彈污染嘅地方，戴口罩有冇用？
K: 口罩有助減少吸入黐咗CS / 二噁英嘅粒子（但隔唔到氣體）都算有用
Q8: 市民家居清潔CS塵粒用咩口罩好？
K: 普通外科口罩已做到基本效果
Q9: 空氣清新機可以去除CS / 二噁英嗎？
K: 可以去除黐咗CS / 二噁英嘅較大粒子，但有可能喺後面噴到全屋小粒子。如好多塵，要定期適當清洗filter (戴口罩)。但如開窗就冇必要用。
Q10: 咩空氣清新機好？
K: 最基本嗰啲已做到以上效果，唔好信有啲咩特異功能嘅機，果啲光分解機不可短期分解到二噁英，而CS自己都會分解。即係除臭同分解甲醛外冇乜用。
Q11: 催淚煙 / CS可以吹到幾遠？幾耐先散？我住XX樓會唔會吸到？
K: 有資料話可去到幾百米，但實際要視乎風向。有啲數據話如果一粒正常大細嘅催淚彈爆咗，50米外15-30分鐘就會冇咗CS效果 (因為已經沉下，100-200米外就安全；我估計二噁英都係咁上下)。但全世界得香港放咁多催淚彈，人口又密集，所以影響必定比外國數據更大。依家香港冇數據，只能靠估。
Q12:咁HCN山埃氣呢？好毒喎
K: HCN真係好毒，但比空氣輕，你係屋企或者行過戰區都冇咁易中到。但太多HCN代表CS分解程度高，產其它毒嘢如二噁英、PCB、PCT亦高昨！
Q13: 雨水能否沖走街上CS / 二噁英？會否污染食水？
K: 可以，去咗海，不是水塘。因為未有試過係集水區放催淚彈呢！入污水渠落海，唔會污染食水
Q14: 雨水沖走啲CS / 二噁英落咗海，食魚有冇事？
K: Dilutional effect (即溝稀咗)，CS / 二噁英到海嘅劑量不大，若非日日食同一個來源嘅魚，估計影響不大。
Q15: 懷疑受催淚彈影響嘅生果，食唔食得？
K: 厚皮生果 (如西瓜，蜜瓜) 用流水清洗，我會食；連皮食或大表面面積嘅生果 (如士多啤梨，藍梅) 我唔會食。
Q16: 二噁英係四圍飄定沉落地面？
K: 黐落塵粒或任何固體/液體，塵粒最後沉落地面或物件表面，最少10年先分解一半。
Q17: 燒膠會否出二噁英？
K: 講咗好多次，要有氯嘅膠如PVC造嘅膠先會燒出二噁英！
- 要燒到出二噁英，要有氯 Cl 同 有機物及温度高。
- 燒乜膠先燒到有二噁英呢？主要有PVC （3號膠、少部份深色嘅膠桶，電線)，佢有氯，有機物。 PVC 由於本身有毒，呢幾十年已經被 PP （5號膠）及 PE (HDPE、2號膠）取代。示威者唔易係街揾到 PVC。
- 由於PVC 含碳量低(38.4%) 而 PP 及 PE (85.7%) ，PVC較難點著燒得，而燒著又臭又乸鼻，示威者好少玩 PVC。而燒著嘅温度低。不如汪 Sir 做吓實驗，睇吓 PVC 造嘅膠箱/桶係咪咁易著火啦！
- 垃圾焚化爐燒 PVC 出到 二噁英係因為温度夠高，你係街嘅開放式燒 PVC 冇咁高温呢。出到 dioxins 機會唔係冇，但好低！
- PP 及 PE 易著火，好好燒，又周圍都有，所以主要係燒佢，冇氯，所以冇二噁英。
- 其它垃圾係冇乜氯，所以燒到出二噁英嘅機會好低。
Q18: 吸咗催淚氣管好唔舒服點算？
K: 我自己中過最甘果次5分鐘都郁唔到，乜水都流，但洗眼5分鐘後已經冇乜事，但個肺痛咗2日，冇睇醫生。當然個個人身體唔同，你如果好唔舒服要去睇醫生。
Q19: 接觸咗催淚皮膚好痕/出疹點算？
K: 唔好R，搽止痕膏 (我用薄荷膏)。BB就咪俾佢R，亦咪用乜膏物膏。當然好唔舒服要去睇醫生！
Q20: 吸咗催淚彈對胎兒有幾大影響？
K: K Kwong唔係咁識Bio，要等各位醫生代解答。但以前啲資料話二噁英導致畸胎，係好長期接觸，唔係幾日幾月嗰啲喎！
Q21: 吸咗催淚彈可唔可以餵人奶？
徒弟Winnie Chan代答: 衛生署話2個鐘內唔餵得人奶。二噁英屬油溶性，會積聚喺人體內油脂細胞，包括母乳，但正路冇咁快入到奶。未有人做過呢種實驗，冇確實答案到底吸幾多就餵得/唔餵得。不過有一點可以肯定：如果自己皮膚有CS微塵，可以餵奶時被BB吸入！
Q22: 催淚彈令經血變黑色點算？
醫生代答: 如淨係經血顏色異常，無其他病徵 (如經期日子唔啱，非經期日子出血，或其他系統症狀) 醫生問清楚病歷同做檢查後，應該都冇咩可以做到。當然私家嘅話可以自費照吓超聲波確保結構上冇問題，但如果排公立分分鐘要排一兩年先第一次見到醫生，照超聲波或者要再排，短期內幫唔到件事。
相關文章：【緊急法下保險失效？】特首立禁蒙面法 示威/遊行/暴動下保險賠唔賠
網民提問
1. 咁蔬菜嗰啲係咪都唔好買住？
K: 有啲危，除非厚皮。厚皮生果如西瓜、蜜瓜用清水沖洗，我會洗。連皮食或大表面面積嘅生果，如士多啤梨、藍莓，我唔會食。
2. 想問下催淚氣體可以飄幾高啊？屋企有小朋友，最近又咳又出紅點，唔知關唔關事。前幾晚屋企樓下射左幾粒彈，隔左幾個鐘成廿幾樓都仲聞到好臭。
K: 最遠可達100-200米，約33-66層，但應該十零分鐘散。
3. 請問清潔家居是否用洗潔精水也可以？不一定要梳打粉水？Baking soda超市缺貨啊, 用baking powder得唔得？
K: baking soda (NaHCO3) 、baking powder (NaHCO3+solid acid)是不同的東西！我要soda。
4. 你話CS/二噁英會向下沈，我可唔可以解讀為去左地下？咁如小朋友高度（100厘米以下高），會唔會易啲吸到呢？如果係，又可以點呢？
K: 小朋友比大人易吸，所以要先清潔咗先。
5. 香港水含有氯氣成份，其實香港人用清水洗有冇問題？
K: 水喉水太少太少氯。
6. 衣物沖水要沖幾多分鐘先標準？
K: 我沖5~10分鐘
7. 如果一放催淚彈時即刻關窗，係咪要加埋膠紙封窗先得？放後幾多小時後可以開窗？
K: 當然膠紙！最少1夜先開返窗
8. 咁尖東辦公室或商場入面會唔會有好多殘留CS 或二噁英？如有，有咩可以做？
K: 入咗中央冷氣就GG，有排清
9. 想請問如果中環商場返工，係咪硬食啲毒？
K: 你成日係馬路返工先值得驚，你係商場怕乜？啲鞋用濕紙巾清潔
10. 餵人奶一直睇網上數據都話4-8個鐘之後先好餵，但係衛生署就話係2個鐘，擔心係報細數。
K: 我估奶粉安全啲
11. 關於清洗衣物上的CS，如果冇用流水沖洗，直接放洗衣機洗兩次，能有效洗走CS/二噁英嗎？
K: 洗多幾次。
