【診所職場事｜寶豬趣聞】先生識議員｜珍寶豬

我問佢:「係咪睇醫生呀先生,係嘅話麻煩你俾身分證我登記呀」

撰文：珍寶豬（funnyclinic）｜圖片：電視截圖

先生嚟睇醫生 話自己識議員

佢:「問你些少嘢先,你係咪選民呀,你都應該唔細啦」
我:「請問同你嚟診所有咩關係呢?」
佢:「呢頭個議員你有冇投票俾佢呀?我同佢都OK熟」
我:「唔好意思先生,我唔係住呢區」
佢:「唔係住呢頭你喺度出現?你呃鬼呀?」
你有冇聽過跨區返工呀叻仔?
我:「我喺度返工咋~你係咪睇醫生呀?登記啦好冇?」
佢:「你住邊度呀?睇吓我識唔識嗰頭個議員,我識OK多人」
我話你識埋閻羅王呀!關我咩事呀~

我:「我住邊度呢啲係我自己嘅事嚟,你要睇醫生同識唔識我嗰頭嘅議員冇咩關係呀,麻煩你身
分證我登記呀?」
佢:「問吓你嗰頭係邊個睇嘅啫,又唔係問你攞著數,睇吓識唔識咋嘛」
我:「身分證呀唔該~係咪登記?」
佢邊拎身分證出嚟邊講:「世態炎涼呀,風和日麗呀」
世態炎涼同風和日麗係咁用嘅咩?我讀得書少唔係好識,但係硬係覺得有種說不出的奇怪感覺啊~
我冇出聲,專心登記。
佢:「我識呢頭個議員,你知邊個呀可?」
我:「我冇留意唔好意思」
佢拍枱:「喂!你點得?睇你個樣唔細呀!選民嚟嘛!連自己呢頭係邊個睇都唔知?」

夠鐘食藥啦,你應該有老人痴呆呀?
我:「我頭先咪講咗我唔係住呢區囉?」
佢:「哎係喎,唔記得,不過你都喺度返工  呀,都係自己人呀。你收順啲我幫你同X議員講你係自己人!」
我笑笑:「你自己入房同醫生講啊,收幾錢唔係我話事」
佢終於收聲。
最後一蚊都冇減, 唔記得同先生講,醫生都係跨區返工添~

延伸閱讀：【診所職場事｜寶豬趣聞】天真的先生｜珍寶豬