【診所職場事｜寶豬趣聞】天真的先生｜珍寶豬

我低頭望望自己，覺得自己唔太好相與:「請問有咩事呀?」

撰文：珍寶豬（funnyclinic）｜圖片：電視截圖

先生冇唔舒服 但想休息一排

佢:「你係好相與呀?」
我:「你講咗咩事我哋先可以了解你有咩需要!」
佢:「我想休息返一排!」
很好，我都好想。我靜靜雞話你知，我腦海入面已經幻想過好多次拎住一疊銀紙，之後返診所同醫生講我唔撈啦，不過從來只有幻想…
我:「係咪需要睇醫生?」
佢:「睇醫生有咩用呀?」
略盡綿力，睇吓你仲有冇得救啦。
我:「唔舒服嘛?唔舒服就要睇醫生，你俾身分證我同你登記呀!」
佢:「我冇咩唔舒服嘅，係想休息返一排，公司叫我拎張健康證明!」

你要嗰張應該係失去工作能力證明喎?健康證明係用嚟證明你有氣有力仲可以捱得世界。
我:「我哋冇寫啲咩健康證明係可以用嚟唔返工一排，淨係知有個係失去工作能力證明，不過都要係你本身身體有事，再搵返相關專科做檢查再證明，我哋普通家庭醫生寫唔到呢啲證明。」
佢:「唔可以就咁求其寫啲嘢話要休息一排?」
是但寫你姨媽到收唔收貨呀?不如你自己是但寫啦，唔駛咁認真喎。
我:「醫生寫得嘅就冇得求其嘅，而且你頭先都講你冇唔舒服，醫生係連一日病假都寫唔到俾你!」
佢諗咗陣:「公司又叫我過嚟拎張健康證明嘅，又話拎咗就可以放返一排?」

答案好明顯啦吓話?你公司唔係真係想俾你休息一排，而係想你知道自己冇機會休息一排。
我:「公司意思應該係你冇咩唔舒服嘅情況下都要繼續返工!」
先生轉身離去。
幾十歲人都仲咁天真嘅?

延伸閱讀：【診所職場事｜寶豬趣聞】病假紙