【診所職場事｜寶豬趣聞】污糟嘅小姐｜珍寶豬

我：「咩事呀？」
佢企喺門口前大嗌：「你快啲出嚟呀！」

撰文：珍寶豬（funnyclinic）｜圖片：電視截圖

小姐跌咗支唇膏落廁所

我都緊張埋一份：「做咩呀咩事呀？你講咩事啦？」
佢不停焦急地揮手：「你快啲出嚟呀！」
我怕係出面有咩人暈咗之類，於是我真係行咗出去，小姐帶住我離開診所。
無論我點問『咩事呀？究竟咩事呀？』，佢都係答『你跟我嚟呀！大件事呀』
我哋一直行，到咗洗手間門口。
…我可唔可以唔入去，我做咗十幾年診所已經患上咗恐懼洗手間候群症。
我企咗喺門口：「啊…小姐，其實有咩事呀？嚟呢度做咩啊」
佢眼神在閃爍：「幫我撈」

…撈咩呀？唔好啦，你放過我啦。
佢：「我跌咗枝唇膏喺入面呀」
就算俾你拎得返，你都唔會再用啦下嘛？你每用一次就好似同個屎坑打車輪咁，你不如去直接奶吓個屎坑呀？
我：「唇膏就算啦，衛生問題唔好要啦」
佢：「唔驚㗎！你幫我撈返上嚟之後，我唔會再用㗎啦」
我：「咁你拎嚟做咩呀？既然都唔要…」
佢：「拎返出去賣都值返百幾蚊㗎，我枝唇膏用咗幾次㗎咋」
即係你請人食屎啦？我係唔會助長你呢個行為～
我：「你自己都知道咩事而唔用，你點可以咁樣賣俾人㗎！唔得唔得！」
我轉身離開洗手間門口。
佢一手捉住我：「你信唔信我一陣入去睇醫生同醫生投訴你蝦我呀？」

我好堅決：「我話返俾醫生知你咁污糟呀！同個廁所咩咩呀」
佢終於肯放我走，不過到最後我發現佢原來唔係睇我做嗰間診所…係睇隔離…