診所職場事【寶豬趣聞】 收嘢呀｜珍寶豬
廣告
【診所職場事】電話響起～
我：「你好～」
我都未講完開場白，佢就一嘢叉埋嚟：「喂？你係邊個呀？」
我～係～奶～奶～呀～我隻雞肶呢屎忽鬼？
撰文：珍寶豬
我：「呢度係乜乜診所」
佢：「我有件嚟緊呀」
我：「件？咩件呀？」
佢：「你同我簽收得㗎啦」
我：「咪住先咪住先～啲件唔係我哋診所嘅，我哋唔收㗎喎」
佢：「我唔喺屋企呀，冇人喺屋企呀，擺住喺你度先啦，晏啲我阿媽都要過嚟睇醫生呀」
我：「我哋唔會同你簽收㗎～」
佢：「我阿媽未返到嚟呀，佢晏啲都要過嚟睇醫生，唔係好大件㗎咋」
我：「或者你睇吓可唔可以改自取件啦～我哋唔代簽收呀」
佢：「哎，我唔理呀，我阿媽晏啲嚟攞呀」
嘟。
小姐發完晦氣收咗我線～
隔咗兩個鐘左右，有位叔叔推門入嚟問我：「啲嘢放喺邊？」
我：「啲咩嘢呀？」
佢：「貨呀，送嚟呀嘛」
我：「你有冇單俾我望望先呀？」
佢拎出一張單，我望望：「個地址上樓㗎喎，我哋地舖嚟喎」
佢：「頭先打俾你，你話冇人呀嘛，嗌我送嚟呢度嘅？呢度唔係乜乜幾號舖咩？」
我恍然大悟，原來頭先電話嗰位小姐真係厚面皮成咁」
我：「我冇聽過你電話呀，都唔係我話送嚟呢度㗎」
佢一手搶返張單，打電話去單上嘅號碼：「喂？喂！呢度唔收你啲嘢喎，你係咪講錯咗呀？」
叔叔聽兩聽電話，再望望我，同我講：「佢話佢晏啲嚟攞喎」
我：「唔好意思呀，其實你都望到我呢度地方唔大，而且我哋診所嚟㗎，唔係幫人收貨寄存㗎～我唔會簽收㗎」
叔叔同返電話中嘅小姐講：「喂！咁點呀？你哋想點㗎？」
叔叔講講吓一臉疑惑咁望住我，收線後，佢：「佢話唔駛簽喎，你做女就唔好做到咁衰啦，幫自己阿媽收嘢都唔得」
我：「吓？我阿媽？」
叔：「我放喺門口呀，你自己因住俾人攞咗佢呀，六件呀，你自己因住呀」
咁都得呀？
叔叔離開後，我望住門口嗰幾大袋綠色集運袋…『而家啲人真係癲㗎喎』。
