90後打工仔唔再係獅子山精神 香港特色奴性思維3大特質｜Purple弟弟｜網民熱話

撰文：Purple弟弟 ｜ 圖片：電視截圖、unsplash

香港特色奴性思維

祖國有中國特色社會主義，而我哋則有香港特色奴性思維。佢哋通常有以下特質：九唔搭八，邏輯混亂、接受程度冇下限、唔肯自己用腦。 以下會為大家一一拆解案例！

特質一：九唔搭八，邏輯混亂

呢類人係逃避當解決事情嘅表表者，你同佢講後生仔好難買樓，佢會同你講月入9千都可以儲4千！你聽完嬲到不得了，先用行雲流水嘅粗口問候佢全家，再破口大罵：「一個月儲到大半份糧就唔難買樓啦咩？」佢就會回一句：「咁你移民囉！」

情況就好似你係學校籃球隊嘅一員，一路殺到入決賽，上半場完結落後緊10分，你問教練如何是好？下半場應該如何變陣應對？教練不疾不徐咁答你：「打第二隊咪唔使輸囉！」

特質二：接受程度冇下限

所謂接受程度冇下限，簡單啲講即係乜都接受到，而呢類人嘅口頭禪往往都係「係咁㗎啦！」

「Peter仔我哋上星期食呢間餐廳好似係40蚊一個飯，依家要成45蚊！」、「係咁㗎啦，你咪又要食！」、「係就係，但你唔覺得…….」，然後Peter仔就會打斷你：「香港地係咁㗎啦！」

相於呢類特質嘅人，我深深懷疑佢哋以前讀書嗰陣冇學到「合理」呢兩個字！你同佢講任何唔合理嘅事都可以用一句「係咁㗎啦！」四兩撥千斤，令人聽落個問題好似唔係問題，唔合理瞬間變成合理！呢種被人侵害自己利益仲幫人講好說話嘅生物，相信係世間少有。

特質三：唔肯自己用腦

呢一類情況好少出現喺後生仔身上，通常係上咗年紀嘅會比較多！佢哋睇乜就信乜，完全唔會自己求證，更加唔會去學習新事物，所以會認為一切新事物都係垃圾。無錯，佢係認為在座咁多位都係垃圾。

相信大家以前都有收過啲SMS，當然依家WHATSAPP為主，係叫你係限時之內轉傳俾幾多個人，否則你就會點點點。呢類人會二話不說照做，當你問佢「你覺得係真㗎咩？」就會馬上觸發到佢哋啟動大腦答你「點會係真？哈哈！」

當你滿懷安慰，發覺原來佢都係一個正常人之際，佢下一句就即刻破功「但寧可信其有啊嘛，我又冇蝕底！」

其實我係創世神，創世神近排手頭好緊，可唔可以借住啲錢比我先。咩話？你話我一定唔係創世神？咁你點證明我唔係先，寧可信其有啊，俾咗錢我保你全家平安啊。講完一大論，遇著呢啲人可以點？我點知啊，因為我都係呢啲人！係咁㗎啦，完。