月入$13,000用$1700買潮鞋 著咗一次我就後悔了
人工$13,000買潮鞋
上年我就用咗大約＄1,200左右買左對全黑籃球鞋，今年再上鞋鋪睇，同一款鞋已經賣緊＄1,500。
最後無理由又買全黑，於是花咗$1,700蚊買咗對全白嘅款，對於人工只有$13,000嘅我嚟講都算係奢侈品。
買完鞋第二朝，我就決定著佢返工！望住純白無瑕嘅乖鞋子，返工心情都冇咁低落。
列車到站：「請先讓乘客落車，多謝合作！」
港鐵職員同廣播系統一齊無限loop呢一句句子，而我係一個守法好公民，雖然排緊頭位，但都好有耐性咁等人落車先。
反而企喺我後面嘅乘客就好心急，用眼神不停問候我母親：
「xxxx，行入去啦死𡃁仔！」
終於佢哋等唔切，開始推我入車廂，不停咁踩到我鞋尾，我嘅乖鞋子就咁俾人污染咗！
返工時段車廂人貼人就一定㗎啦，我算好運，搵到位置可以扶手，難為身邊嘅打工仔要練平衡，見到都覺辛苦。
車一開，唔知邊條友仔平時唔練好打工仔下盤基本功，失重心撞向其他人，要停止呢個衝擊，最後當然係撞到有扶手嘅我先得已平息。
「Sorry啊，踩到你！」
唔踩都踩咗啦，我可以點。
「唔緊要！」
我嘅乖鞋子又受辱了。
大約畀人踩咗10下左右，我成功由天水圍到達觀塘！
行過工業區，即使天清氣朗，都總會有幾攤積水，加上舊區重建，到處都係沙泥飛濺。
行到返公司，對新鞋已經有幾撻污漬，我欲哭無淚。
原來喺香港，人同鞋都係一樣「愈純潔、冇機心嘅愈生存得唔耐」！
延伸閱讀：
以為咁樣夠黑仔？返到公司仲要俾人單打…
香港人出名鍾意投訴，但往往投訴都唔係對事，而係出自不岔同妒忌。
見到人有我冇，投訴！其實可能係先到先得形式；以為有折扣，點知埋單發現冇，投訴！
原來自己睇錯宣傳單張，不過唔緊要，樣衰咗咪投訴職員態度差，得咗……
漸漸地，呢種因不岔同妒忌而引伸出嘅橫蠻思維，滲透入職場。
例如護士咁，近年有唔少人詬病護士人工太高，都係執下屎屎尿尿嘅辛酸絕對對得住份人工，假如自己都咁高人工，絕對唔會呻辛苦。
所以我幾時都說香港打工仔思維上係進步得最快，自己做緊基層，思維已經跳到管理層，唔係諗自己點加人工，而係諗其他人人工太高，要減一減先得。
低薪打工仔一樣受害
不過唔好以為得高薪人士先會受害，低薪打工仔一樣走唔甩！
筆者月入$13,000，工作量唔多，每日可能做半日咁上下就完成等收工。
不過即使你做好本份，無影響到其他任何人，一樣會有同事為你加上標籤。
莫名其妙地被憎恨
「你就好啦，日日都咁hea…我做到成隻狗咁啊！」
所以係我錯？我俾嘢你做嘅？而情況只會愈來愈嚴重，呢類同事好快會將自己工作量多嘅仇恨，全部灌輸晒係你身上。
「唔好問我嘢煩住我先啦，你估我好似你咁成日咁得閒。」
慢慢，你會發現自己已經莫名其妙地被憎恨，你諗極都唔明，老細出低人工兼俾高工作量佢，但點解呢類人走去將脾氣爆落自己身上？
因為佢地同投訴心態一樣，純粹係出自不岔同妒忌，我唔要加人工減Workload，你咁hea，我要剝削你嘅hea！
你說打工仔點唔大壓力，自己友都唔團結鬼打鬼！
要對付刻薄上司之餘，仲要得閒安撫智障同事，以免佢哋心態爆炸，造成大規模傷亡。
所以話，搵到間有好同事又少是非嘅公司真係要好好珍惜。
