阿媽掟$300萬幫阿仔俾首期 阿仔話吓乜要供樓㗎 | 網民熱話 | 樓市
撰文：不覊 ｜圖片：新傳媒資料室、電視截圖
唔忍心要仔女俾家用 仲幫俾首期
不覊有唔少朋友啲仔女都係搵萬二三，為人父母，如果本身有份唔錯職業，又有啲老本，真係唔忍心要仔女每個月俾家用自己。
每月搵得嗰皮零嘢，又要食又要著又要搭車又要應酬又要進修，左計右計，左度右度，到月尾真係所剩無幾。
上星期我同個老友飯聚，有兩個寶貝仔仔的朋友，而家就係煩緊呢個問題。
費事相見好同住難
佢細仔仲讀緊大學，暫時唔使理住。問題出在大仔身上，好幾年 Grad咗，響間私人機構做到中層的大仔，月入 $35,000，佢都算幾乖，係鍾意打機，又無拍拖，唔使返工間唔中都會陪父母飲吓茶。
老友見大仔開始大，心都好想佢可以成家立室，只係暫時未有拖拍。之但係老友兩公婆都好鬼心急，佢見香港啲樓價係咁升，驚個仔過多兩年拍咗拖，到真正要結婚時無樓住喎。
查實老友有層港島三房大單位嘅樓，佢一家四口，萬一真係有娶新抱的一日，啲後生又無樓住，如果又未有小朋友，千呎大單位住多個新抱仔其實都好足夠啦。老友兩公婆聽我咁講，立時耍手擰頭 NO NO NO！！
相關文章：30歲後生仔打工 到底買樓好定創業好
有錢梗係買多層
老友話喎，兩代人生活習慣大不同﹐捱咗幾十年，兩公婆都想有番自己生活，無謂住埋一齊，萬一唔夾，分開住大家都有氣抖。
有錢買多層樓就梗係好啦，之但係家陣啲樓價咁貴，個仔收入又唔高，點買先？唉！！仲有乜計呢？咪就係靠父幹囉。
老友打算兩公婆掟$300萬幫個仔俾首期﹐想買將軍澳沿線啲細單位，大約600零萬啦，諗住幫阿仔出樓價一半做首期，等個仔慢慢供啦。
親生仔不及近身錢
大仔家陣搵成三萬幾，層樓俾咗$300萬做首期，仲有 $300萬要供，如果分 25 年供，每月都係$12,000左右，都過到壓力測試，佢家陣又未拍拖，絕對應付到啦。
誰不知，阿仔一句說話撻著老豆老母，兩公婆好開心咁同個仔講呢個諗法啦，點知阿仔一句 ：「 吓 ！乜要供架？ 」兩老當堂火姐上身 「 真係火都嚟。 」當堂諗起親生仔不及近身錢呢句說話，立即收回成命。
故事發展落去唔知會點，但家陣啲後生個腦諗緊乜，我哋老一輩真係唔多知。
