診所職場事 成功幫老細倒米
廣告
有日有位小姐嚟到診所。
佢行埋嚟登記到處『啪』一聲放低身分證：「登記呀」
我：「嗯，好呀」
佢：「寫轉介信㗎嘛？」
我：「俾醫生了解咗你情況先，有需要嘅就會寫轉介信俾你去專科」
佢：「我可以揀去邊間㗎嘛？」
我：「轉介信上面只會寫去邊一科，上面冇醫院或私家診所名嘅，你到時可以自己睇去邊間～」
佢：「我要去政府。」
我：「一陣俾醫生了解咗你情況先啊，你可以坐低等嗌名，身分證俾返你先」
佢：「你幫我CHECK吓我係去邊間呀」
我：「而家都未診症，我唔知你有咩需要，所以我答你唔到啊」
佢：「我睇皮膚呀，你見唔見到呀？」
我望望佢…
佢指住自己塊臉：「呢啲洞呀」
吓？你因為啲皮膚凹凸洞所以要轉介信去政府睇呀？
我：「你因為呢啲所以去排期睇…？」
佢：「係呀，唔得咩？」
我：「你呢啲唔影響健康㗎喎？」
佢：「唔靚呀嘛」
我：「公立醫院唔幫人整容㗎喎？」
佢翻白眼：「咩嘢整容啫～我邊有話要整容呀？你咩事呀？」
我：「唔係你諗住醫院點幫你呀？」
佢：「整返平佢囉」
我：「佢哋唔會㗎喎，你呢啲要自己去私家搞㗎～」
佢：「私家貴呀嘛」
我：「公立醫院唔係為咗幫人慳錢而喺度嘅…」
佢：「即係唔醫我啦嘛？」
我：「你呢啲唔影響健康嘅皮膚問題要去私家嘅，私家幫到你～」
佢：「我呢啲洞係以前生暗瘡留落嚟㗎，點樣唔影響健康呀？暗瘡都有菌㗎」
你成個人都係由菌組成添呀～
我：「喺度拗都冇用嘅，我只不過預先講俾你知有呢個機會啫。」
佢：「而家係本小姐唔俾機會你呀，我唔睇啦！」
阿小姐就咁離開咗診所，我又成功幫醫生倒米…
