診所職場事 寶豬趣聞 不信任我的姨姨 下集
廣告
上回講到電話裡的小姐因為唔信任我，唔願意將佢嘅問題講俾我知～搞到佢要親自嚟問醫生。但…診所真係好多人好忙。
佢人未到，我已經聽到佢把聲。
未入到門口已經聽到佢嗌：「我嚟咗啦～我頭先打過嚟呀」
我嘆咗一口氣，今舖一定又瀨嘢。
佢行埋嚟登記處：「頭先我打過嚟，問醫生嘢呀」
我：「我知～不過頭先我都有同你講，今日好多人，問嘢都要排隊啊，咁麻煩小姐你俾覆診卡號碼我，而家登記就排第二十一個」
佢：「二十一個？」
我：「係呀，頭先我都同你講好多人㗎啦～」
佢：「我要喺度等成廿個人呀？」
你中文能力冇問題呀，非常準確非常好，我：「係呀」
佢：「唔係呱」
係瓜瓜哇哈哈。
我：「係呀～一係你轉頭再嚟啦，你可以出去行吓嘅」
佢冇出聲行埋一邊坐低。
電話又響起。我又分唔到身聽電話～任由電話響～
佢坐喺度大嗌：「聽電話呀！」
佢拎住手提貼住耳朵…你打嚟的嗎？
我望住佢，拎起電話，：「喂？」
佢同步：「喂？」
…..大家只不過相隔幾個身位，你做咩要打嚟？
佢：「我有嘢問醫生呀」
我收線，向真人嘅佢問：「你做咩打嚟呀？我哋面對面㗎喎？」
佢發爛渣：「你做咩收線呀？」
然後佢再打過嚟，電話又響起。醫生，不如你出一出嚟，呢度有位重症呀。
我：「小姐，你有咩你直接講啦好冇呀？」
佢：「聽電話呀！」
我灰晒咁拎起電話：「…..」
佢好大聲：「醫生！我知你聽到㗎！」
我死直直拎開個電話聽筒：「….」
佢好好好大聲：「醫生！點解你開俾我啲藥咁硬㗎？我受軟唔受硬㗎！」
大家都冇反應，亦有機會係唔敢俾反應…
佢更大大大聲：「醫生！聽唔聽到呀？硬會啃死我呀！」
……呢個就係你千辛萬苦排除萬難都要問嘅問題嗎？醫生，你都係出嚟啦～
最後…佢要食軟嘢～全部轉晒做藥水。
