診所職場事 寶豬趣聞 不信任我的姨姨 上集
廣告
有日電話不停響起～但好不幸我已經分唔到身去聽電話，因為…
診所得返我一個姑娘。
終於喺佢響咗唔知第幾次，我接到了！
我：「你好，乜乜診所」
佢：「喂？」
我：「係～你好～乜乜診所呀」
佢：「有人聽啦咩？我打咗幾多次過嚟呀！搞咩呀？」
我：「唔好意思呀小姐，今日診所好忙又得我一個，所以頭先一直忙緊聽唔到電話，請問有咩事呢？」
佢：「我唔係打嚟聽你解釋點解你唔聽電話呀！」
咁頭先你問我搞咩嘛…我咪答你囉？
我：「請問有咩事呀？」
佢：「我噚日嚟睇完醫生，有嘢問醫生呀！」
我：「醫生睇緊症呀，有啲咩問題想問嘅，我幫你問呀～轉頭打返俾你啦」
佢：「你覺得你會記得我咩？」
我不能忘記你呀！
我：「我會寫低嘅，放心，食晏前一定覆你～」
佢：「唔得呀，我對你份人好冇信心。」
估唔到你平時係咁留意我咁了解我。
我：「醫生係唔會聽呢個電話㗎，如果你真係要親自問嘅，要過嚟診所㗎，今日好多人呀，問嘢都要排隊呀～你俾我幫你問，咪可以唔駛咁頻撲囉」
佢：「你肯定你會幫我問？」
你俾人呃大㗎？人與人之間嘅基本信任都好似冇咁嘅，我好忙呀，我想收線呀，可唔可以快啲呀～
我：「I PROMIS!」
佢：「講咩呀你？」
我：「呀，我應承你～」
佢：「都係信唔過你，我自己過嚟問醫生啦」
嘟。
….咁我頭先喺度講咗咁耐電話為咩呀？
