唔好俾人睇死 每份工作都學到嘢
到十幾年後嘅今日，我仲記得當年第一份工發生過嘅事…
我第一份工，係Online Game網友介紹我嘅一份工，呢份職業現時已經幾乎絕跡，就係「洗樓推銷員」。
唔知大家有冇印象，十幾年前仲好流行有個推銷寬頻上網、長途電話、有線電視…嘅人突然撳你屋企門鐘，你一打開門就出盡力咁推銷你，如果適合，仲可以即時喺門口幫你做登記，非常方便。
當年我做嘅係長途電話服務，每日每個推銷員要洗三棟樓，由頂層至地下，逐個單位拍門，晚飯後八點至九點係開單嘅黃金時期，大家都返晒屋企，食飽飯無屎屙。
一棟樓幾百個單位，三棟加埋成千個，但成功率每日大約只係開到十幾張單。夏天又熱又要行樓梯，都咪話唔辛苦。
呢份工雖然做得唔耐，但短短呢幾個月我學識咗好多嘢。除咗喺屋苑樓下結識到唔少女仔之外，我每日要同幾百個人溝通，面對住唔同嘅人，我溝通技巧都好咗好多。
返呢份工之前，我性格比較內向細膽，講嘢表達能力亦唔太好。但自從做咗呢份工，我就可以好自然咁對住陌生人表達到自己想表達嘅嘢，對我日後好大幫助。
喺好多人眼中，呢份係無乜出息嘅工作。
有次親戚飯局，我放工著住件員工衫，諗住大家屋企人無所謂啦。點知成餐飯嘅話題都係圍繞住我點解要揀呢份工，唔好好哋讀書，無前途無出息人工又低，慘過做乞兒…
我個人認為，每一份工作，先不論薪金或未來前景，都有佢令人成長嘅地方。就算係做「老麥」，一定都會有嘢學到。
我哋細細個讀書都係由淺入深，你唔會讀完大學之後，嫌棄小學咁幼稚，讀嚟將來都無用。
每一個階段，都能夠畀你經歷到唔同嘅嘢。
所以，啱啱畢業煩惱緊搵咩工先最有前途嘅年輕人，其實唔需要諗太多，你第一份工通常唔會做一世，放心畀幾年時間自己，做啲自己真正有興趣嘅工作。
藍橘子為80後網絡作家，憑【我是技安，我出席了大雄的葬禮】網絡創作爆紅。
facebook專頁：https://www.facebook.com/BlueGodZi/
公司同事最莫名其妙的行為
人生必然經歷過不斷轉唔同工種,不斷轉公司。但若干年後,你覺得塵世間已無嘢值得留戀,於是你放棄尋尋覓覓,留喺一間公司奴役終老…
因為你覺悟到,無論轉幾多份工,你始終都唔會鍾意返工。
喺你腦海入面,共同為目標奮鬥,上下一心去解決問題,努力付出係有回報嘅公司,只係一個現實唔存在嘅烏托邦…
當我轉咗好多份工之後,仲發現到一樣野,就係每一個辦公室都擁有一群相約行為怪異嘅同事…情況就彷如象棋都一定有兩隻炮兩隻車。
而每一間公司,除咗有個老闆之外,對落總係有一班「好同事」維持辦公室地獄生態。
一) 『你老母係咩時辰生你出黎?』
老實講!真係有同事問過我呢個問題…呢類同事對你嘅年齡、住址、家事、私事,甚至乎星座都極濃厚興趣,由你入職開始,就好似查家宅咁「住邊頭啊?幾歲?搭咩車返工?有冇女朋友?」簡直煩過你老母。
然而,你永遠無法猜度佢知黎做乜,因為佢可能連自己都唔知問黎有乜用,但佢就總係不停打聽你嘅私人生活,然後作出評價,或者留返食飯Dead air時扔出黎作為話題。
二) 『一齊聽接駁鈴聲』
工作上同其他公司溝通就少不免,尤其係大公司,撳幾十個制,等一輪都未駁到真人聽電話。而有一種同事,就好似要話畀全世界人聽。
佢打緊電話咁,開到speaker好似HiFi咁,佢自己就行到老遠部影印機print野,難為坐佢隔離嘅同事就一直被噪音騷擾,普通鈴聲都算數,最煩嘅就係對方電話有接駁鈴聲。
三)『影印機洗牌法』
我明白撳完個Print制嗰種心急嘅心情,亦明白見到影印機出極都唔係自己野嗰種無奈。
但有啲野唔屬於你就唔屬於你,點急都無用。當你順序咁print一大疊開會用嘅文件出黎,當然係想順返次序拎埋位。
但呢位性急同事就幫你幾張幾張抽出黎,又唔排返次序,到最後你就好似玩襟棉胎輸咗咁,將一疊亂晒次序嘅文件疊齊返埋位重新排好次序。
而最令人氣憤嘅係,佢仲用一副怪責嘅口吻同你講:「下次Print咁多張出聲嘛…」
四)『洗碗定煲粥啊請問?』
每當飯後時間,Pentry一定堆滿同事,有人要斟水,有人要洗飯盒,有人等埋魂魄返齊肉身先繼續工作。
總有一部分同事,好鍾意喺Pentry傾計,一傾就無停口,最幣係佢一邊洗飯盒一路傾,或者企喺個斟水機面前傾。
喂大佬啊!你哋同公司,咁多話題咪放工傾飽佢囉!我想飲啖水啫!最慘係,當你行埋去講聲「唔該借借」嘅時候,佢哋就會驚死你偷聽佢講嘢咁,即時靜晒,等你行開咗先繼續傾,咁神秘入廁所傾啦不如。
公司係一個大家庭,但同事唔可以好似兄弟姊妹咁對待,唔可以隨便出聲,但呢種「少少事」每一刻都不斷累積,就會變成你壓力嘅最大來源。
放鬆啲?準時放工我咪放鬆囉!
延伸閱讀：
【今日留一線 日後好相見 得體辭職的7個貼士】
http://www.edigest.hk/?p=25449
【時間過得真係快 又係時候講bye bye 11個離職訊號】
http://www.edigest.hk/?p=24386
