急症室勁唔夠人 條條人命都緊要架

人命
其實我真係好唔明，點解梗有啲人自覺自己條命矜貴，佢條命係命，人哋條命唔係命？
話說呢個星期好忙，個場爛到呢⋯⋯
急救房case一個接一個，於是出面得返我一個，當做緊「人流管制」（即係解答查詢，處理投訴，分工叫阿姐急急腳推人上病房）有個阿嬏大聲吆喝：
「我11點嚟等到2點幾都唔睇我，係咪我死咗先有人睇呀！！」
嗱，你叫還叫，我哋救緊命，你話我草菅人命咁就唔係好妥囉。我去搵吓佢啲資料，睇睇佢響度等咩，然後先出去處理佢。
我查完，一踏出去，觀眾席（大堂）勁多人，佢見到我就大聲叫：
「阿姑娘，你係咪想我等到死先睇，11點等到依家！我等咗四個幾鐘！」

「首先，你1點嚟登記嘅，依家2點幾，正確係等咗一個鐘，依家急症室等候時間係2小時，所以要煩請你等一吓。另外，（指住嗰盞轉轉吓嘅急救指示燈）入面有病人生命有危險要搶救，所以可能要等耐少少先有醫生睇。」我都唔細聲咁覆返佢。
「你有冇搞錯，佢條命係命，我嗰條唔係？！睇我先啦！佢，由佢死咪得囉！日日都有咁多人死架啦！」佢好晦氣咁講。
坦白講，你講粗口我都無咩嘢，佢呢句簡直難聽過粗口。於是我又大聲咁答佢：
「你條命係命，人哋嗰條就唔係嘅！人哋死緊頭，佢需要我哋去搶救。我諗你都想係你命危嘅時候醫護人員搶救你先架！」

後排嘅「觀眾」都向我點頭，什至有人豎起手指公。