9類惡頂麻煩同事 遇到一定要避開

所謂「一種米養百種人」，職場上各式各樣嘅人都有! 有時人在江湖，身不由己，點都會遇到一兩個麻煩同事，搞到自己頭到大埋!

本身做嘢都夠煩，仲要煩埋呢啲難搞同事，都咪話唔頭痛! 筆者總結咗9類麻煩同事特質，唔知一眾打工仔身邊又有冇呢啲同事呢?

1.口沒遮攔型
有啲人天生把口係唔收，一開口就鍾意講同事壞話，又鍾意對人哋評頭品足。
有唔識嘅同事經過都可以睇人唔順眼，仲會喺背後講人哋點點點。同事個樣生成點、著咩衫都要講一餐，講少句都唔得咁。

2.口水多過茶型
佢哋幾時都好多嘢講，覺得唔講嘢就周身唔聚財。

明明其他同事好專心做緊嘢，但呢類人都係會無停咁不斷喺隔離「bilibala」。有呢類人坐隔離真心會好慘，應佢又唔係，唔應佢又唔好。有時只好扮塞住耳仔聽歌，同自己講: 我聽你唔到我聽你唔到…

3.痴身痴世型
無論你去斟水、食飯或者去廁所，都好鍾意跟到你實一實。
做親乜都要一齊，「好似一秒唔見如隔好多個秋」咁。講真大家又唔係熟到要一刻都離唔開嘅程度，應該要有私人空間，唔使下下都要痴埋一齊。

4.諸事八卦型
佢哋咩都鍾意去八卦一餐，明明其他team自己傾緊嘢，就算唔關自己事都要聽埋一份。
呢類人特別鍾意八卦人哋私隱，之後仲會口多多周圍唱，驚死其他同事唔知咁。

5.大聲公型
習慣大聲講嘢嘅人其實唔覺自己大聲。
無論係公事定私事，呢類人一開口就會好大聲，變咗全公司嘅人就要硬食，被迫要聽佢講乜。雖然大聲唔等於無禮貌，不過無人想聽同埋會覺得好煩囉!

6.稱職冗員型
佢哋做人唔單止Hea得就Hea，做嘢仲會卸得就卸!
同呢類同事合作，遇到乜都會話唔知、唔關我事! 有時你都未講完，佢就會即刻話唔知，但其實可以聽埋先囉! 真係唔知呢類同事返工係做乜，問乜都話唔知，講又話唔關佢事，對住呢啲人真係心很累呢!

7.玻璃心型
呢類同事內心係非常非常之脆弱同敏感，喺職場上一唔順就會大受打擊!

重點係出嚟做嘢又點會一帆風順，所以心理質素同抗壓能力一定要高。同佢哋共事有時都好無奈，因為佢哋可以因為比老細鬧而down足成日，甚至黑足成日面，變咗自己都要受佢氣咁。

8.自我中心型
佢哋眼中只有自己，只會活喺自己嘅世界。
呢類人覺得自己永遠是對的，又會好鐘意批評其他人，但又唔鍾意被人批評。所以佢地好難同其他人合作，因為根本無辦法溝通到，對其他意見更加聽唔入耳。

9.練精學懶型
呢類人做嘢唔叻，但諗計偷懶就最叻!
佢哋唔會花時間同心機落工作上，只會花時間去諗點樣有技巧地「扮工」而又唔會俾老細發現。例如佢哋唔想做嘢時就會叫其他同事做，但就話係老細叫；明明係自己做錯嘢，又會話係其他人叫自己咁做!