男女在一起 你為對方做過的 小事

由細到大成十幾年，大大話話喺TBB、YouTube Suggested Video，仲有好似真係有月光寶盒啲片無限輪迴既有線41台，夾埋睇左方麗娟幾十次，講好笑唔洗問實係方鍾Sir，睇靚仔連男人都會丁爆吳彥祖，論on9就首選去高級餐廳叫油菜果段，但最最最感動，我一肯定會揀呀娟被逼同歐海文分手呢幕，沒有之一。

文章授權：逆行@電視汁撈飯

方麗娟悲傷既神情，歐海文落寞既雙眼，最重要，係佢好很無奈咁舉起手中既木塞，細個睇唔明，大個睇到想喊。

因為似曾相識的對白，感同身受的經歷，這感覺大概每位男主腳都遭遇過，次次鬧交都係一啲我地覺得雞毛鴨蒜既野，身邊一大堆麻甩友人就經常噌 (我的朋友不是我)，女友最鐘意問佢地點解成日淨係自己顧自己，小小事也不願意為她們做或改變，她們永遠不是「首選」。

首先出街遲到，你已經死了。奈何地鐵會塞車，屯門公路會癱瘓，喺香港做野英文字母的順序由MNOPQRSTUV..變成O之後就到T；

她想你有交帶，讓她時時刻刻知道你在做甚麼，但你唔似蜘蛛俠可以一夜變身，生活都係起身搭車返工食飯痾屎做野放工搭車瞓教，周而復始，萬像更新，up黎up去都係果啲update，

加上要怒覆email 、missed call同開會，八點放工已經崩潰，要下下報到有時真係力有不遞，
到你真係好似鐘樓咁準時，佢又出大絕—「都唔係真心既……」；

佢又想你見多啲佢屋企人，但無諗過你最唔想又俾佢雙親問「最緊返工點呀、順唔順利呀」；
要一早在出街前計劃好當天活動，但香港除了行街睇戲食飯其實仲有咩搞請求高人指教；

那些百天、千天、多少個月紀念日，要準備有心思的禮物，不過在第3個情人節之後啲貨已經乾塘；
還有不自覺地忽略了你，例如打機、打波、睇愛情動作片或一些所謂無謂的興趣，只為在這個異常現實、男人必定要力爭上游的現實世界尋找不現實的快感。

當然，以上所講既所有理由，佢地睇黎都只會係你唔夠重視佢地既藉口。

然後，佢地就會問一啲難過TSA同DSE，漫長過立會拉布既問題，

「你做緊咩呀」
「有無掛住我呀」
「做咩你唔搵我既」
「你今日有咩做呀，點解你唔約我既」

個人黎講，對呢句更加情有獨鐘 — 「點解你無野做先打俾我既？搵我攝時間？」
如果有野做，即係有野做啦，有野做又如何打俾你呢？

到無野做第一時間打俾你，喺物理學既層面你又真係對我既行為作出左一個具體、客觀既陳述，無從反駁。所以面對呢啲問題，我都好想學梁特答「對過別事件我唔作出回應」

而同時我地呢堆麻甩佬都會心諗「好小事姐…..洗唔洗呀….」，但你愈覺得唔緊要既小事，女人就愈當做人生大事，「點解你為左我小小野都唔肯做丫？」

佢地容易不安、要人氹既天性，就算果堆好似帶唔出咩大道理既小事，佢地就會感到好親切，發掘出背後無限的大意義；
如果男人係中國，成日搞啲軍事演習呀、例行戰略調配，咁女仔就係日本、美國同台灣，揣釋為世界大戰的徵兆：

不遲到原來代表期待這個約會，你好掛住佢，想多一點時間相處；
成日報告做緊乜，等如你無時無刻惦念著她；

預先悉心安排好行程，吃飯時不掛著玩弄邪惡的電話，記得帶情侶飾物，是重視約會的表現；
紀念日即使不花費巨額款項慶祝，也會用心準備手製小禮物，就係對一路走來回憶的珍重；

和她吃自己不喜歡的菜，彈一首自己原來不認識的歌，和她看一套自己沒興趣的戲，記著她每一句話，曾經逛街時說過喜歡的東西，就係愛佢多過愛自己；

一早reserve定下星期的時間，讓她感受到自己比其他東西、約會排得更高，無論是足球、Division或者兄弟。

有睇過《解碼遊戲》，都知主角解納稅德軍啲code解左幾年，但以上女人既code，可能一世你都唔明。子華神亦教識我地，男人可能可以為你死，但無可能為你喺地鐵織完一條頸巾。

因為死是一時之氣；但織條頸巾或者其他更小的事，要搞一頭半個月、影響係一年甚至係一世…我地仲覺得咁無謂，點解要做？

不過如果有一個女仔，肯跟你呢個無權無勢，無車無樓既麻甩咁耐，而又咁緊張啲芝麻綠豆野，你又願唔願意，或者做過啲乜野唔緊要既「小事」呢？

約左佢就早多多出門口；
真心諗起佢自然會搵佢；

見面時不要只顧玩電話，一星期見多幾日，不要掛住打機、踢波，願意早一星期約定她；

除左上網搵番號、守住條中路，你仲會俾心機搵下有咩好食好做好玩好地方；

好似好簡單唔係好緊要，你又點估到原來咁樣樣，佢就已經感動到又喊又笑。

「我就係想同你去歐洲，跟你學好啲廣東話…」聽完，呀娟真係喊左出黎。

今日喺香港，要成為可以託付終身的首選，好多時要有車有樓、再加埋Pandora、Tiffany、Cartier，
但如果你遇到一個真心願意為你改變，咬著木塞讀報紙既男人，有無錢我唔知，起碼，佢已經將你當成佢既首選。

不過，你都要預左佢係讀緊體育版，唔好嬲，因為你希望佢處處著緊你的同時，也希望你記得他的一切，其實一啲愈小既事，就愈難做好或者改變，到真係格硬改變左佢，又係咪當初一齊果個佢呢？

有時理由定藉口，兩睇啦。