返工長期對電腦勁辛苦 9 個有效急救法

長期望住電腦，對眼會好攰，因為由像素組成的電子字符邊界模糊，令人眼難以維持焦點，所以眼睛會不知不覺間試圖將焦點由字符轉到背景，以放鬆眼球肌肉，但反覆切換焦點就會導致眼部疲勞。另外，在電腦前工作會降低眨眼嘅頻率，由正常一分鐘眨眼17次，降至一分鐘眨眼12至15次，同時令眼睛濕潤度降低，導致眼睛發乾、出現紅筋等。

無同電腦螢幕保持適當嘅距離，仲會導致頭痛同肩頸痛。好多時唔覺唔覺，個頭就愈嚟愈近個螢幕，對眼就需要更用力去聚焦，眼球肌肉太過繃緊，就會牽連埋個頭都痛埋，特別係太陽穴個位。而且，個頭太近螢幕、張枱嘅高度唔適合，連帶坐姿都會唔正確，肩頸縮起，姿勢保持一段時間就會引致肩頸痛。

坐Office對電腦仲有其他問題，長期久坐好容易導致下身肥胖、水腫，女士尤其嚴重，同埋血液集中係腿部，頭腦仲會無咁精神。女士仲要擔心另一個危機，就係長時間喺冷氣房，皮膚喺低濕度嘅環境下，會被抽乾水分，如果坐位喺窗邊，仲會加速衰老、面部愈來愈多皺紋同暗啞。

唔想返工返到又肥又殘，就記住以下6點喇！

1. 舒緩眼睛不適，記住「20-20-20」法則，即每望電腦20分鐘，休息20秒，望向20英尺(約6米)以外嘅地方，畀眼睛有休息嘅時間。

2. 減少頭痛機會，頭部與電腦螢幕保持喺51-66厘米之間，令眼睛有舒適嘅聚焦距離。

3. 避免肩頸痛，要保持良好坐姿，調較坐椅嘅高度，讓手肘可以平放喺枱面、電腦螢幕比眼睛低10-20厘米；唔好蹺腳坐，避免盆骨唔平衡而導致脊椎痛。

4. 午飯後散步30分鐘，加速血液運行，唔會聚晒啲血喺下半身，有助消除下半身水腫問題。散步仲可以有提神作用，唔會飯氣攻心、腦閉塞。陽光仲有助身體吸引維他命D，有助改善情緒，醒神啲。

5. 返工要做足保濕，可以喺枱頭放個加濕器，使周邊嘅空氣保持濕潤，皮膚唔會被抽乾水分，慳返買護膚品嘅錢。

6. 如果坐位喺窗邊，就記得拉埋窗簾，或者加返個遮光板，唔會畀皮膚長時間接觸到紫外線。

除咁做足預防措施，仲有啲伸展運動可以坐住做。

1. 坐著抬腿

保持上半身挺直，坐到座椅的1/3位置，雙手捉實座椅扶手，左右腳輪流抬起至與大腿成一直線，維持30秒，每邊做5次。

2. 腰背伸展

坐喺座椅上，雙腿固定好，平放踩地，將上半身扭轉向左邊，頭部180度轉，雙手放喺椅背，伸展腰部，保持15秒，再轉向右邊，做相同的動作。

3. 肩頸拉伸

腰背挺直，十指交叉緊扣，向前伸直，掌心向外，然後雙手保持緊扣，高舉過頭，頭部微微向下，維持10秒，做15-20次。