銀行搵食艱難 連我戶口得雞碎咁多都唔放過
有日，接到同行電話。
「你好啊溫小姐！我係XX銀行客戶經理，我姓陳！最近有啲優惠介紹返，想同你免費升級做XX理財。」
「吓……我戶口得幾百蚊咋喎，升咩級啊？」哥仔你冇打錯？不過見係行家，就傾多兩句。
「無錯，就係我哋銀行做緊特別推廣，可以免費升級，升級之後仲可以有XXXXXXXXXX優惠(下刪1000字)……」
「咁升級咗之後我戶口無一百幾十萬會唔會扣錢㗎？」
「我哋係首年免手續費嘅！」
咁……即係就算升級完一年之後又要去downgrade返啦，咁鬼煩，都係唔升啦。
「Er……唔使啦唔該。」
「點解呀？升級咗之後我會專門跟進你戶口情況，定期提供返啲理財意見。不如同你約個時間做返個升級？」
原來友行搵食咁艱難，連我呢啲戶口得雞碎咁多嘅人都唔放過。雖然我好同情你，但……長貧難顧啊朋友！
「我……唔得閒……」其實我好窮㗎咋！
「咁唔知你幾時先得閒呢？」
「唔使啦唔該。」
「我會好認真睇住你戶口㗎！」其實我日日都好認真睇緊我戶口嘅，但我真係自身難保啊！
「Byebye……」
「真係唔約個時間見面？」老老實實，你係咪暗戀我啫？！
「不如……?」
「嘟～～～～～」
Sorry，雖然咁大個女都未試過比一個金融才俊鍥而不捨咁約我，但我真係頂唔順賴死唔收線，同埋……我唔想見你。
作者簡介：
溫柔，九十後銀行前線女職員，
幻想自己是銀行家，現實上為跑數妹。
上至銷售投資理財保險產品，下至開戶申請貸款信用卡，
全部一手包辦。
畢業於四大商科，高不成低不就，終日銷售，
為一萬幾千折腰。
於 2016 年開設 Facebook Page「90 後銀行小妹甩轆記」，
分享每日在分行上演的奇趣事、遇見的瘋狂客戶和職場點滴，
引起不少讀者共鳴。
作者今年剛推出新書《銀行小妹甩轆日記》
新書簡介：
★ 90後銀行職員瘋狂洩密，甜酸苦辣，一書包辦！
★ 60篇銀行前線滑稽實錄！
★ 無論身家一百蚊定一百億，出世開始就避唔開理財！
【同行、客戶均有共鳴！】
存款、投資、借貸、定期⋯⋯升跌賺蝕！梗關你事！
◎瘋狂客戶特輯
－非VIP都可以排Premier條隊？
－用JM Tone開戶口會著數啲？
－分行有《奪命金》真人版上演？
◎職場甩轆日常
－Banker原來只係Sell禮品？
－「開戶三寶」係邊三寶？
－情侶開聯名戶口有詛咒？
◎銀行前線二三事
－銀行職員唔同崗位有乜分別？
－想投身「銀行孽」有冇捷徑？
◎節日限定合集
－銀行掛曆利是封免費任攞？
－生日可享Premium服務？
