耀才老細標尾會 賣甩「細仔」救「大仔」︳凍鍵茶專欄

小股民如意算盤就未知敲唔敲得響，但今年73歲嘅耀才老闆葉茂林就成功「標尾會」，終於賣得走個「仔」，28.15億港元袋袋平安。點解咁講？佢多年前接受訪問，就講過證券業只係佢嘅「細仔」，要「揼石仔」經營，非常花時間，所以「二仔」係佢嘅酒吧生意，而「大仔」係物業投資。

事實上，佢嘅「二仔」早就為佢賺咗一大筆，最經典要數夜總會「Magmum」。九十年代已經開始投資「的士高」嘅葉茂林，第一間投資嘅Disco用700萬買入，3,000萬賣出，之後再買入三間「老蘭」嘅「地標」：Magmum、Billion，同埋Beijing Club。

Magnum Group港交所上市

2014年，三間的士高以Magnum Group名義喺港交所上市，當時公開發售部分超額認購3,500倍，據報630萬元嘅「頂頭槌」入飛都只係獲派三手股份，成為當年超額認購王、凍資王。不過Magnum上市兩個多月，就發出盈警，市值曾單日蒸發9,378萬港元。2015年初，持股近七成嘅大股東葉茂林突然賣盤，套現逾4億港元。葉茂林俾股民話佢「割韭菜」，佢就解釋年紀大，未能兼顧太多業務，賣盤後同年9月Magnum繼續發盈警，旗下「Beijing Club」宣布結業。事實亦證明後來嘅「老蘭」已經風光不再，佢都算賣得及時。

相反對於「大仔」，葉茂林就寵愛有加。佢老人家喺九四年第一次涉足物業買賣，當時以大約六、七千萬港元買入中環皇后大道中九號十三樓一層，轉手價1.3億港元。之後多次買賣物業，甚至喺2021年下半年，葉茂林短短三個月內以9.35億港元掃入多個物業。當中，包括以5.25億港元買入銅鑼灣波斯富街本德大廈一籃子舖位、2.1億港元買入銅鑼灣怡和街46至54號麥當奴大廈地下A號及F號地舖及地庫全層、同埋2.056億港元買入渣甸山豪宅白建時道47號皇第中層A室。

依家香港地產咁嘅市況，睇怕葉茂林就「摸咗頂」。唔通好似粵語殘片嘅劇情咁，「阿爸」賣咗「細仔」，就係為咗要養住「大仔」？