特朗普勢夾高日圓 返鄉下好唱定錢︳凍鏈茶專欄
廣告
關稅事件日日有新進展，花生一日多過一日。好似特朗普喺共和黨內部晚宴上發表演說時誇下海口，話各國忙著kissing my ass（拍馬屁）請求達成協議。
日圓已7個月新高
作為香港人，千祈唔好以為可以置身事外，輕輕鬆鬆食花生，尤其係五時三刻都鍾意去日本嗰堆，一定要留意事態發展，事關特朗普政府對中國加徵關稅重於市場預期，全球股市一片紅海，避險情緒不斷升溫，紛紛投入日圓保本，100日圓兌港幣已經升穿5.4，成為7個月以來新高。
隨時5.4都係未來低位
日圓繼去年八月加息拆倉，今次亦因為全球股災而再次拆倉。唔計拆倉風險，長遠而言作為美國佬條𡃁嘅日本，都一定要升值。幾乎得罪晒全世界嘅特朗普，唯獨表示同日本關係好好，因此激發咗對美日貿易協議嘅樂觀情緒，為避險日元提供額外支持。加上，當全球要刺激經濟並減息之際，日本央行副行長內田信一表示，如果基礎通脹達到2%目標嘅可能性增加，央行將會繼續加息。
事實上，唔俾日圓眨值一直係特朗普嘅算盤之一，所以莫講話兌港幣 4.9呢口價早已成為過去，隨時5.4都係未來低位。大家如果有計劃去日本，好及早唱定錢！
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
