散戶想搭順風車？望實呢隻2025值搏股｜凍鏈茶專欄
廣告
農曆新年話咁快又到，大家都係時候檢視吓自己個股票倉！筆者向來屬穩陣派，揀股心法係希望有啲升幅加有息派，然後再因應大環境入手一、兩隻「值搏股」。手頭上有買入價大概$62太古A（0019.HK）、$68左右嘅中移動（0941.Hk）、$18 中海油 （0883.HK），同埋$62友邦（1299.HK）。不過，踏入2025年，見到有啲股票上咗高位、或者個勢唔夠強都會出貨，近排沽左啲太古A(約$69.5)、中移動（約$76）、友邦（約$60），最後又喺$140入咗美團（3690.HK）。
至於所謂「值搏股」，其實就係睇吓大股東們有冇動作，乘勢坐番轉順風車，舊年維他奶（0353.HK） 都幾和味，見信和（0083.HK）黃志祥王家族出手掃貨，來勢洶洶想做敵意收購，咁就跟住炒番一轉，約$7.5買，$11左右就放左，諗番起都幾開心。
講到今年嘅值搏股，筆者就睇好之前叫新創建，依家叫周大福創建（0659.HK）嘅股票。一切都要從大股東角度出發，有見佢近排賣大陸公路，如果順利可以套現百幾億，大股東周大福企業揸住七成幾嘅股份，希望博佢派特別息。
有鑒於前年周大福創建剝離新世界（0017.HK），改由母企周大福直接持有嘅一連串舉動之後，就開始有甜頭！舊年二月底公佈中期業績，宣佈派特別股息 $1.79，當日股價就爆升兩成升到近$9，近排股價又回到$7.67，宜家買安全系數都算高，可以博一博 。今年二月都差不多時候公佈中期業績，就算冇特別息，股息點都有幾毫子，況且周大福收購新創建嘅時候講明 ，會提高派息，亦承諾維持周大福創建（0659.HK）嘅上市地位，最近更加「係咁意」發半年$7.8億CB(可換股債券）比4厘息率，呢啲操作都係想維持個流通量，免得周大福企業揸超過七成半，加上換股價係$8.043，到時周大福創建個股價冇返十蚊八蚊，又點吸引到CB持有人換股呢？總括嚟講呢隻股票諗得過，可以考慮列入做2025年值搏股！
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
撰文：凍鏈茶
