捱足七年 中資科技股終翻生｜凍鏈茶專欄
廣告
DeepSeek(深度求索）突然異軍崛起，近日不少外資將焦點重新放喺中概股之上！加上有傳國家主席習近平下周一將與DeepSeek創辦人梁文鋒，阿里巴巴（9988.HK）創辦人馬雲、騰訊（0700.HK）主席馬化騰、小米集團（1810.HK）創辦人雷軍等會談。預計習主席將鼓勵企業家在中美愈趨緊張的科技戰背景下，積極拓展國內及國際市場業務，並會討論點樣促進同埋支持民營企業發展。
阿里巴巴（9988.HK）呢兩個月由80幾蚊，升到120以上，升幅達四成多。而騰訊、小米、美團、京東等都分別都有近三成至一倍嘅升幅。有貨嘅投資者，確實係過咗個肥年，不過對於好多散戶嚟講，ATMXJ真是一個惡夢，尤其是阿里巴巴。唔知大家宜家仲記唔記得ATMXJ係咩？佢哋就好似美股七大巨頭（Amazon、Apple、Google、Microsoft等等），幾年前個倉點都要袋返幾隻旁身。而恆指亦靠住ATMXJ氣勢，升勢如虹。
不過2018年，國家以國進民退、共同富裕為方向，呢班富豪同佢哋嘅公司，亦漸漸滑落，馬雲更是首當其衝，之後生活有咁低調得咁低調，一時返農村，一時又去滑雪或打高球。散戶同富豪一樣，經歷長年低谷，依家大家都仍然被一股陰霾濃罩住，ATMXJ股價雖有升幅，但距離當日個頂峯，好似阿里巴巴，股價曾見$300，但螞蟻上市撻Q後就一落千丈，所以坐緊艇嘅仲有好長遠路先返到家鄉。
相對之下，美股七大巨頭雖然中間經歷不少加息之下帶來嘅震蕩，但相對2018年，股價已經飛升不少。2025年，講平就梗係ATMXJ啦，不過短炒定長揸，大家就要睇定啲啦。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
撰文：凍鏈茶
