VIPExclusive ︳鬼王潘紹聰 人生最窮撳機透支︳陳小芝
樓換樓致富秘技失手？
縱橫陰陽兩界、是人是鬼見盡無數的「鬼王」潘紹聰（Edmond）生財有道。早在十幾二十年前，他已是我們陽間好友們中，賺盡掌聲的樓換樓之王，他的住所面積愈來愈大，樓價當然愈換愈高，其投資搞作亦愈搞愈多，極之勵志。
「鬼王」到底是如何煉成？回帶到從前，他最初的目標只得一個，就是做DJ：「我唔覺得自己有才華，我純粹鍾意，好想做。我細個住屋邨，屋企有套Hi-Fi仔，我播得好大聲，我要畀人知道我播緊乜嘢歌。」
我：「成條邨啲人都要欣賞你嘅音樂品味？」
他：「無錯，起碼嗰一行（鄰居）！」
除了在屋邨「播歌」外，Edmond的音樂之路相當全面，他還加入了張學友歌迷會，「我鍾意學友啲歌，咁啱當時有個同學係佢歌迷會嘅人，所以加入。」然後鏡頭一轉，1990年某日，他從英文報章得知香港電台招聘節目助理，入行機會終於來了！他立即寫信去應徵，面試當日才得知聘請的崗位是交通報道員，「嗰時仲返緊學，我part-time報交通！做咗一排剛剛新城開台，有個同事辭職過檔。始終報交通唔係我最想做嘅嘢，我想做同音樂有關嘅工作，所以拜托同事介紹我入新城，1991年陳任就請咗我。」
難與「上把」森美合作
說到這裡，他當時月薪仍未過萬，但終於可以播到歌，「幸好當時無乜嘢家庭負擔，就算之後95年跳過去叱咤903，夥拍森美主持《青蘋果與紅提子》，都係無乜嘢錢㗎咋，我都仲係新人，唔會特別搵到大錢。」
我：「我記得你好快又返番去新城？好似一年左右。」
他：「無錯，一年，我係裸辭㗎！我唔怕再講，我當時同森美拍檔，佢係偶像，年紀又細過我，而佢開始有其他嘢、開始拍電影喇。作為一個拍檔一定會比較，一定有呢啲情況發生。當然，我唔係偶像派吖嘛，雖然心裡面好想係啦（笑），當時無傾過嘅，但感覺上森美係『上把』位，可能性格使然，好多嘢佢要決定、要話事、要畀意見，當然佢好聰明，講嘢轉數好快，覺得咁樣拍檔落去，自己唔會好開心，我唔想繼續合作。後來森美嘅拍檔變成小儀，電台就畀咗另一個時段我去做，食住中山美穗大熱電影《情書》勢頭，我主持咗一個叫《情書》嘅節目，可惜收聽率唔好，與其再被調去做朝頭早，我決定辭職。」
想當年， Edmond這種性格被稱之為我行我素，今日大概會叫go with the flow。他超重視自身感受、不計算公司品牌對個人發展的利弊，而收入多少亦非他的最先考量。
「裸辭之後我無嘢做，亦都唔可以立即去另一個電台，我咪搵工囉！始終唔好離開呢個圈，所以入咗TVB寫稿，負責《我愛鬥一番》包片，對住啲日本節目影帶mark bite寫tag，再搵人配音，之後亦負責過啲唔知乜嘢騷咁。我都做過ATV，幫《今日睇真D》寫稿，最後就返番去新城主持節目。」
「你人生邊段時間最窮，有無試過窮到刮沙？」我問。
「又未至於刮沙，但撳提款機要撳到cash advance。應該嗰時喺新城，供緊樓㗎喇。」他說。
「你咁有guts去供樓？你邊一刻發現樓換樓係個賺錢機會呢？」
「我老竇係退休公務員，佢有筆錢，阿媽決定唔畀佢用晒啲錢，於是借咗30萬元畀我做首期，當年第一層樓百零萬，已經住紅磡囉喎。嗰時投資地產係人都賺錢，當時又未有辣招，所以今日買咗（層樓）第二日已經可以放，我覺得逼住去供款，就等於逼住我儲錢。其實要多謝老竇阿媽，無嗰30萬開始，就唔會有而家儲到嘅呢筆老本。我又好少做其他投資，見到當時香港地產蓬勃，樓宇買賣就係一個搵錢嘅方向。」
人氣≠錢
大部份「鬼王」的支持者都會說：「我細細個就聽你做節目！」他們口中的節目，正是1999年Edmond的事業起飛作《恐怖熱線》。
「其實我唔覺得嘅！」他很淡然，「我只係覺得個節目令到有人認識我。《大頭怪嬰》年代嘅《恐怖熱線》爆紅，都只係爆咗個名，同我嘅收入無掛勾。多一個人認識你，又等於你會多一蚊咩？唔會嗰喎，亦唔會多咗幾個job。一個靈異節目主持，唔會突然多咗MC工作，無嘅，真係無、完全無。」
當年的《恐怖熱線》並沒有把Edmond留在電台，他2007年過檔網台，成為香港Online主持的先驅。說到真正賺錢，就要從他離開comfort zone，自己去經營網台開始。
「唔係我自己要做㗎，我全部嘢都係『被安排』！我無諗過十幾年前，可以叫人畀錢去聽我做節目，無諗過呢件事，唔覺得係可以成功嗰喎，係咪先，點會覺得人哋會畀錢去聽嘢呢。係因為馬死落地行，香港人網老細蕭若元唔做（結束營運），咁我都要自己做啲嘢啦，我無其他收入㗎嘛，就係靠住大家嗰一句：我每晚都要聽你個節目、唔聽唔得㗎！」他親揭成功的經過，「都十幾年前喇，唔怕講，最初係6,000幾人（訂閱），嗰時好似月費30元，咁我就話『一元一日』，容易記。當時嗰個數（月費），係我唔覺得我人生會賺到嘅錢。」
突然賬面月收18萬元，買大，果然開了一鋪大。當年萬一失敗收場，他又可有plan b？
「無得話博唔到，因為我始終都要做，唔通唔做呢個節目？只不過個形式可能唔係咁啫，或者再去搵人請我囉，而家咪唔使（打工）囉！」
我問：「收入多咗，於是有本錢去樓換樓？」
他說：「我會覺得如果我啲錢喺度，如果唔郁呢，你層樓升幾多都唔關你事。所以我會自住，同時層樓亦係一個投資工具，加上兩、三年我就想轉一次新環境，我又唔怕搬。我有嗰嚿錢，如果一直將間屋變大，即係我儲嘅錢應該會越嚟越大，因為我供嘅錢會愈嚟愈多，當然我要經過壓力測試，銀行借到畀我先得啦，咁啱我認識咗一位地產商頭目，佢有聽開我節目嘅，佢旗下有一間屋，擺咗喺度五、六年都賣唔出，因間屋樓價好高但座落喺一般嘅地段，複式單位但又無車位，所以好難賣得出，於是佢畀咗個七折我，佢同我講：你賣就賺錢㗎喇！的確，賣嘅時候價錢都OK嘅。」
他現時自住的單位，卻變成了負資產。一直贏開巷的他竟然失手，又怎樣面對這一局？
「大勢所趨，始終自己有一間屋，點都好過幫人供樓。呢幾年嚟，無人知樓市會轉差成咁，咪自住先囉！我成日都講：自住就唔輸嘅，先隨遇而安，總之我一日唔賣，我一日都無輸，因為我唔想輸。」
為新城犧牲髮型
財富、健康同樣重要，熱愛運動的Edmond努力保持狀態，幾年前已推介我食益生菌來改善腸道健康，還時常提醒我多做運動，十分感動。他的健康狀況又如何？身體哪裡的問題最困擾他？
「頭髮！」他笑著回答，「我無乜嘢唔講得。」
我追問：「點樣睇你自己嘅髮型？」
「我（嘅頭髮）為新城電台而犧牲嘅一件事。我當時做通宵、每晚十二點到早上六點，搞到朝早七、八點先瞓覺，要去養肝養腎就唔應該做通宵，咁你換囉，有啲嘢！頭髮的確曾經困擾我，因為當時唔知將來條路點行，但你又控制唔到，咁點呢？好彩而家呢個年代…作為一個幕前人，或者我已經建立咗嗰樣嘢（靈異形象），慶幸大家都接受咗，無因為呢件事影響咗自己嘅星途。」
我沒有逗他高興的，我跟Edmond說，和他擁有相同「髮型」的男藝人們，位位都家庭齊整，有兒有女幸福滿滿。我問他何時才會有「鬼后」和「鬼仔」的出現？他仍然想娶妻生仔嗎？
「係我自己點樣揀啫，我可以選擇嘅！我之前覺得我唔會被人管到，我覺得（結婚）呢件事係需要嘅，但我太揀擇。好彩男人70歲都可以做爸爸嘅，睇你做唔做啫。去到我呢啲年紀，如果有小朋友一個就OK，有就好似人生會完整咗。」
「你認唔認同自己好運？」以下這個問題我一直都想問他：「你靈探咗幾十年都無事、百毒不侵咁。我哋正常人又怕鬼，又驚冒犯同騷擾（靈界），你點睇靈探呢件事？」
「我認同自己好運，靈探，你要睇下乜嘢人去睇呢件事。就算你去行下，咁你行緊嗰個地方都係人哋嘅，你行下都進入咗人哋嘅範圍，呢個行為都係騷擾嚟嘅。但我哋既然做得呢個工作，我會定義為——我只係純粹去參觀，去睇下佢哋（靈界）嘅環境，我無作出任何破壞同騷擾，我無令到佢哋唔舒服，或者有時我會帶啲嘢去燒，呢個通常都會做嘅，總之唔會去挑釁，當然我哋會用一啲嘢去測試，佢哋鍾意咪溝通囉，而家都係咁樣。」
傳說中「腦霧」
人人都說Edmond記性差，節目中出現過的撞鬼個案他不記得、聽眾的名字他不記得、很多事情他都不記得。
「我唔係記性差，而係我決定有啲嘢唔記就唔記，因為人嘅記憶力愈老愈少，我哋唔係加30元買一個月嘅iCloud。如果我記性唔好，係做唔到舞台劇嘅。」
想安枕無憂，大家應該向Edmond學習。首先，他會定期做身體檢查；第二，他購買的保險產品十分全面，「因為我身邊有人做保險，包括我細佬，所以保障範圍同內容會比較清晰。其實我好早就買保險，讀書時、30年前已經有買。我五、六年前開始買埋年金，真係香港第一批人買，因為要防範於未然。我而家睇番，又真係可以儲到啲錢嗰喎，因為到咗某個年數，啲錢又可以拎番出嚟用，可以幫到自己。」
買了延期年金的他，將來有甚麼退休計劃和部署？
「以我嘅性格，我覺得都真係唔使退，一部電話已經可以做直播，根本好難完全唔做嘢。課金之嘛，我相信有人課幾百元、一千元，我就可以搵到食。至於樓市，我覺得一定唔會返番去以前咁好，一定唔會，我而家都企咗喺度，因為我唔鍾意有輸嘅感覺，唔賣就唔輸，我啲股票都一樣，我唔賣就唔輸，我睇佢幾時升番！仲有，因為我而家手上嗰件貨（現住物業），算係區內唔係太多可以代替得到嘅特色戶，即係你鍾意我間屋，你就要買，貨源唔多，所以我會等個有緣人出現。我都希望可以快點甩咗佢，咁我就經濟自由啦，而家真係綁住咗嘅！」
無論經濟自由或是仍在捱騾仔，都必先有副強健的偈。健了身幾十年的Edmond，藉此勸勉大家多做運動、多曬太陽，多出汗排毒，外表看起來也會較年輕的。
