買樓有錢就得？「買樓不難 要買到便宜樓就難」｜1%Anthony｜經一專欄

撰文：1%Anthony ｜ 圖片：新傳媒資料室、unsplash

如果讀者的首期資金與入息很充足，瞌埋眼都借到按揭。如果不介意買便宜或買貴樓，總之買到就得；如果你純粹想買一層樓自住，賺蝕無眼睇。 如果無諗過將來住大些、住好些，無諗過買多幾間投資；如果閣下好鍾意靠返工賺錢，無諗過靠投資物業財務自由。 真係可以咁講：買樓使乜學？有錢就得。

買樓學問之多，窮一生也學不完。

要提升搵筍盤技巧，先從最基本講起，如何買到樓？已是很多未「上車」年輕人的煩惱。 第一關要解決的是首期、按揭，如何儲首期？要儲幾多？如何申請按揭？ 可以借幾多？如何可以借盡八成、九成按揭？月供幾多？是否可以負擔？ 如果儲不夠首期應該點做？有甚麼融資方法？如果入息不夠應該點做？聯名擔保應該如何揀？這是第一關。

當然讀者可以好無知告訴自己，儲錢儲到夠先買。儲到五成首期先諗。但當儲到幾百萬元，就算樓價不升，讀者都退休啦。 第一關是如何令自己有能力買；第二關是如何買得便宜買得抵。 樓市有高有低，就以2018年為例，不少上車盤高低位相差20%至30%。

例如沙田第一城入場兩房單位，高位普遍600萬元，筆者的學員最便宜450萬元就買到。 又例如嘉湖山莊三房細單位，樓價高位近700萬元，筆者的學員最便宜490多萬元就買到。 買樓不難，要買到便宜樓就難。不但要睇得準、要果斷行動，最重要是提升搵筍盤及議價技巧。筍盤得幾個，為甚麼是你買到？為甚麼代理要給你筍盤？ 當然買家可以說，我並非為賺錢。但睇住別人買平百幾萬元，當真不會谷氣嗎？

買樓要買得便宜買得抵

第二關是買得便宜買得抵，不要買錯樓；第三關是如何將資產倍增。 無論是為將來住好些也好、為早日財務自由也好，都要求進步。 第一層樓買便宜了，幾時賣？幾時加按？如何細屋換大屋？如何一間變兩間？屋企人個個買了樓無晒名，如何再繼續倍增資產？工商舖車位如何投資？ 內地樓、海外樓如何投資？將來的路可以走得很遠。

筆者有幸當年揀選這條路，由一個300多呎的上車盤，到今天與拍檔做全幢重建，親身見證過，當然讀者可以同自己講，買樓並非求發達，不過，好多人都靠這條路提早財務自由。 而你是否甘心打工捱世界？放開自己多看看這個世界，會發現更多可能性。