買樓係理想定現實 冇錢 理想都係得個想字｜網民熱話
廣告
【買樓・網民熱話】「人係會變架！」呢句說話我聽過好多次，亦都喺讀書呢幾年入面深深明白呢個道理。啱啱入大學嗰陣個個都有唔同嘅目標，「要上莊」、「要讀到想讀嘅科」、「做自己鍾意嘅工」。但係唔知由幾時開始大家嘅目標都變得好一致，就係想做政府工、想買樓。當然，都會有唔一樣嘅人。
撰文：Ting ｜ 圖片：新傳媒資料室、unsplash
畢業即儲錢買樓結婚
「香港買樓咁貴，一畢業我就去做政府工，跟住就同男朋友儲錢買樓結婚架喇！」呢類人一般都幫自己訂咗目標，就係以買樓為自己嘅終生目標。佢哋知道喺香港買到樓就代表人生已經成功咗一半。
有樓有高潮
但係香港買樓就同中六合彩一樣咁難，當你以為已經儲夠首期嘅時候，你就會發現你嘅收入其實重未追到樓價。所以一般而言，買到樓嘅都可以視為香港嘅「成功人士」。
理想主義者
為咗唔成為一條鹹魚，亦有人諗住一畢業就去追尋自己嘅夢想。佢哋明白到「個個都唔買樓，唔通個個都唔想買樓咩」呢個道理。或者佢哋都想買樓，只不過唔想將大半生嘅青春，去換一棟可能只係得二百尺嘅單位。有時隨遇而安態度係香港嚟講可能會過得重開心。畢竟，唔係個個都有機會、有能力可以做到自己想做嘅野。可能有時唔跟大隊行，或者仲會有意外收穫呢。
冇腳雀仔
好多人都好嚮往去一場說走就走嘅旅行，所以每逢sem break 好多同學都出走去旅行。每次返到嚟總有人將其他地方同香港比較，外國嘅樓平啲、嘢食平啲、空氣都清新啲。講下講下，就變咗一場說走就走嘅移民，一講到畢業大家都想離開香港。有時都會諗，如果唔係香港出世可能一早已經成為咗大家所講嘅「成功人士」。
當然未必個個都想移民，可能只係去下其他地方體驗生活，做下嘢，過一個真正既working holiday。
