交稅唔係最慘 稅局計錯稅 先係打工仔最慘嘅事｜Purple弟弟｜職場制勝

撰文：Purple弟弟 ｜ 圖片：新傳媒資料室

良好公民要交稅

不過作為一個良好公民，雖然依家港人生活質素一直下降緊，心底有千萬個不願意但都唔想成為罪犯，惟有乖乖交稅。

當你千辛萬苦填好稅表，盡好自己責任想交稅，稅局一個出錯，你就會明白咩叫生不如死。

稅局網頁設計玩死人

話說，筆者就有被計錯稅嘅經驗，仲記得係某個星期五夜晚，我拆開稅單查閱，發現條數多到離曬譜。

最慘係星期一先係工作天，我打電話都要等兩日。

我唔甘心，醒起自己好似有稅務易帳戶（係到語重心長建議大家，用電腦報稅可能就會降低出錯機會，唔好學我懶，唔願學習新事物）。

我登入後搵到提出反對申請頁面，心諗都幾順利同方便，當我填好所有嘢，按下「提交」果陣，個頁面跳返出去稅務易主頁……

喂，大佬！你收唔收到我啲資料都講聲啊，你跳返出去咩意思先？收到定收唔到全部靠彩數？

我唔排除當中有意外，所以我又再試多次，由頭填過再「提交」，結果一樣，最後我總共係網上提交咗三份申請。

體諒人手會出錯　但態度唔好審犯

經網上提出反對稅項後，我星期一就收到稅局主任電話，我明白稅局職員都係人，有時睇錯數或者計錯數都無可厚非。

但唔好態度好似審犯咁，果種感覺似係錯不在自己，但要自己證明自己清白般荒謬。

當時要處理計錯稅呢個問題其實唔複雜，但心態好易崩潰，情況就好似你同事搞出個大頭佛，老細叫你OT幫佢搞返掂件事咁！

依家係你計錯數，我要花額外時間去處理，要不斷同稅局職員交涉。

仲要把握時間，如果唔係我都要根據個「錯數目」交左稅先，事後稅局先退返計錯嘅比我。

最唔甘心係咩？你話做客人見到態度差、做錯事嘅職員都可以追究下，但係稅局計錯，你都只可以硬食無得追究！

根據法例，稅務局係唔會就評稅錯誤向市民作出賠償！

而我自己都唔係想要咩賠償，只係希望唔好令我精神層面上增添任何壓力，雙方盡快去處理呢個問題已經好開心。

又或者，可唔可以試下計少唔好計多。