人工包埋 難聽過粗口 薪金從來唔包唔合理事情 | 職場制勝
廣告
【人工・職場制勝】近日香港醫療系統不勝負荷的新聞源源不絕，不少在最前線的醫護人員都表示做唔掂，希望加人手、起多啲醫院等等。而往往最難聽又最防礙大家討論嘅留言，首當其衝一定係呢一句「人工包埋」。人工從來都唔係包庇唔合理事情嘅報酬，而大家都唔好仲停留係人工代表實力程度，代表工作量多少嘅象徵，一但你咁諗，自然會心理唔平衡。
人工係反映供與求
多勞多得，讀多啲書搵多啲，其實都係正確嘅！
不過唔係惟一一個條件，多勞係可以多得，你做銷售員，簽多啲單咪賺多啲囉！
但你作為一個洗碗員，你今日洗500隻，聽日洗600隻，係唔會令你多勞就多得嘅。
其實我想表達嘅嘢係咩？就係現時太多人將「多勞多得，讀多啲書搵多啲」上晒腦，見到其他人收入好過自己就會去批評其他行業人士係「well paid for it」
無資格提出改善工作環境嘅要求，講到尾其實就係放唔低「多勞多得，讀多啲書搵多啲」呢兩句包袱！
心理唔平衡，接受唔到自己認為自己已經「多勞」咗，點解無「多得」？
雖然我無「多得」但我都仲做好呢份工，點解啲「多得」咗嘅人仲嘈嘈閉。
所以我好想點醒你地，人工可以係同實力、知識有關，但都可以完全無關！
世上仲有好多工種，都有機會「多得」而且未必需要實力，所以唔需要自命懷才不遇，因為你哋唔係無人欣賞，而係「懷才不遇高人工」而已。
人工包埋真正用法
上面講咗，唔少人用「人工包埋」呢句說話去包庇唔合理事情，聽落會難聽過粗口。
而打工仔我哋應該一致槍口對外，只需要係「人工包埋」後面加個㗎字，就可以縱橫職場！
下次老細叫你開OT自己嗌外賣，試著說:「人工包埋㗎？哈哈」
又或者搭的士出去開會無得Claim返錢，都可以說:「人工包埋㗎？哈哈」
一方面可以表達不滿，對方有機會知難而退，另一方面氣氛太尷尬又可以話講笑化解，進可攻退可守。
最緊要係唔好比人恰到上心口，與其不甘他人高人工，不如先捍衛自己應有打工仔權益，令整個職場更健康，到時咪齊齊加人工。
