月供3隻股票 股價最近勁跌 唔想止蝕 可以咁做 ｜龔成信箱
撰文：龔成 ｜圖片：新傳媒資料庫、unsplash
1.止蝕
你好！我剛做野一年幾，每月可儲25000，開始試下買股票。但係依家手頭上貨都偏貴，加上近排跌好多，如下：
0700 騰訊 100股 $316 100股 $417.4 167股月供 平均$386.2
1299 友邦 200股 $70.3
1398 工行 3000股 $7.09
應該繼續渣住定止蝕？
我由今年二月起月供$10000 騰訊(0700)，但係供親都係貴貨，而家諗住改$5000 騰訊(0700)同$5000 盈富(2800)，會唔會好d？定係直頭唔應該再供騰訊？謝謝！
龔成老師：
你現時持有的股票，都有質素的，但買入價較貴，可以要守一段時間，不過不用太擔心，這些股都有得守的，暫時不用止蝕。
但你要調整一下整個投資模式及概念。
我地要建立一個組合，這是一個優質股的組合，如果你組合內只集中在3股，會有集中風險。另外，這個組合要長線持有，你不同理會中短期的股價，如果組合的股票優質，甚至希望中短期股價跌。
舉個例，例如月供5年，咁你最希望的，是這幾年供款的時候，股價大跌，令你可以不斷掃平貨，之後到5年後大升，這是最有利的。
因為整個月供都是一個長期的計劃，只要企業的質素不變，股價下跌是一件令人興奮的事。所以，你只要保持進行就得，建立一個平衡的組合，長期進行，不要理中短期的股價。
如果以組合來計，你供$10000股票，最好有$6000是盈富（2800），騰訊（0700），可以供$2000，餘下另一隻股供$2000，你之前太隻中在幾隻股票中。之後就是長期進行，不理會中短期的股價，長期月供就得。
（對照龔成信箱：Q7868）
2.強積金
老師，想問你點睇自選強積金？我由2005年到依家賺左26.98%，包括中華威力，康健護理，XX增長基金，大約十年前停左再無入錢，應該再放錢左入去嗎？
龔成老師：
強積金是一個超長線的投資，要用長遠眼光睇。
即是說，如果你看好這些版塊幾十年後的增長力，就唔需要太理會這刻的情況。所以最好是持續供款，不用理會中短期情況。
如果你現時仍年輕，未到好大年紀，咁上述的版塊仍是適合你的投資，可以再投入。
（對照龔成信箱：Q7863）
3.收息股
老師，如果我想平穩收息，係選擇啲收息股比較好？
定好似出面啲人咁，見低就放一舊錢落去，升就沽出？
龔成老師：
如果你想長期收息，分注買入收息股是最好的。你可以建立一個收息股的組合，長線持有。
你可以保持分注買入，當見到股價有較多回落，就可投資多啲。但就唔建議一次訓身落去，因為無人知幾時見底。
另外，坊間一般都會叫人升左就放，然後跌翻時再入，這方法表面可行，但卻知易行難，做到的人極少，反而我見好多好多人，最後是賣左後，股價不斷升，永遠都追唔翻。
所以，我建議是「分注買入並長線持有」，不斷咁樣收息，這是最好的策略。
（對照龔成信箱：Q7862）
4.月供股票
龔sir您好，本人28歲，想每月用$10000做月供股票，會選盈富再配搭以下幾隻，想請問以下幾隻合適嗎？
或有其他更適合的可推薦？應如何分配會比較好？
有幾隻心水：823領展、1211比亞迪、27銀娛、2318中國平安、12恆地 謝謝！
另外還有10萬蚊現金，有沒有優質潛力股推薦？
謝謝解答
龔成老師：
上述股票都適合月供的，因為這5隻股票，除了有一定的質素外，同時有增長能力，都有穩中求勝的作用，以你現時的年齡，是適合投資的。你可以每隻供$2000，保持進行就得，唔好理會中短期的上落。
至於$10萬現金，如果你想投資潛力股，可以考慮中生製藥（1177）、福壽園（1448），但這兩股都不平宜，你唔好心急投資，等佢回翻D先開始。同時，這類潛力股的風險較大，不能太大注。
這$10萬建議你不要心急用，以等機會的模式，睇準D先出手，目標是更大的回報。
（對照龔成信箱：Q7864）
5.濰柴動力（2338）
你好！龔sir!
想問2338 約8.9入左
以現情況守不守
龔成老師：
濰柴動力（2338）質素不差的，佢主要從事生產及銷售柴油機、相關零部件、汽車及其他主要汽車零部件、非主要汽車零部件、進出口和叉車及倉庫技術服務。
本身有一定的規模同技術，但盈利就有少少波動，這難免令佢的股價上落會較大。
這股可以守的，你不用太擔心。雖然中短期仍會波動，相信長期不會太差。
（對照龔成信箱：Q7865）
6.派息基金
龔成老師，你好!之前睇左你幾本作品之後，覺得你所分享嘅知識真係好貼地，好易令人明白。同時亦見你好積極咁係ED經濟一週到無私咁分享財識比人，同埋都經常咁解答唔同朋友ge問題。
都比左好幾個重要ge概念比我，如「先增值，後現金流」、「儲資產而非現金」等等，我都好期望咁跟住呢d方向走，希望他朝一日都可以去到同你一樣ge層次，但目前我都感到方向係有，但又唔知點做好，好希望龔成老師可以指點下我。
我今年23歲，澳門人，無家底，岩岩畢業出黎做緊社工，月入未夠2萬；
持有現金10萬；
與另一半的聯名儲蓄有4萬；
父母亦有15萬資金交由我進行操作，現買入宏利安聯派息基金10萬(每年紅利約8%回報按月派發)，仲有5萬之前就進行股票炒買(但因之前起伏太大，現追平左就唔太敢再炒賣)。
保險每年供自己約1萬，供家人約8000；
萬通年金每月供1500，年供就18000；
每月個人洗費約4000、家用3000、與另一半的聯名儲蓄4000
現仲差政府學費16萬，可免息分期還，每月約還2000。
咁樣計計下條數，啲錢真係分配得八八九九，所以我真係唔知點做先可以令自己ge資本增值得快d；有諗過開源去?外快，試過2度創業，但又係時間就唔到同冇太多呢方面ge知識唔夠投放太多資金落去就無疾而終
亦做過好多場MC每場都有1000左右ge收入，但做做下發現自己語言天份不佳同MC能力不夠就冇繼續落去。
依加自己諗諗下又冇乜特長，方方面都好平均，唔上唔落咁，所以我自己依加都感到十分之迷茫，希望龔成老師指導下點樣先可以?到真正ge自己同埋點樣可以使自己GE財富可以增值得快啲。
龔成老師：
其實睇你的理財狀態不算差，你已經盡力做好，但如果要突破，就要另一個層次。
睇得出你這年紀已懂得理財，上述你講的配至，基本上無乜問題，你照住做就得，當然，你最好強化翻股票上的投資，這才是最主要的進攻部分，你要投資多翻少少落這裡。同時，要多增加這方面的知識。
至於你如果想突破，我有兩個建議，第一，努力學投資，加強選股、企業估值、投資時機的能力，只要這方面做得好，你投資更多潛力股，就可以將你的資金滾得更大，將來的財富會變到好唔同。
第二，你試試再做MC，你可以出去先上下堂先，我相信這是你突破的方法，這個世界所有野都有得學，無人一開始就認，大家都是慢慢進步。
我而家是股票班的導師，每堂都要對住過百人講野，但以前係中學，老師曾經講過我係全班最靜的一個，我一直都好驚公開演講。
到我出來做野，先慢慢逼自己，初期講得唔好，但一次唔得，我又試過，之後又試。你可以上堂訓練下自己，我相信這是你的突破位。
唔之你有無聽過「力克」（無人無腳的演說家），佢為左做到演說家呢個目標，由中學時間已不斷訓練自己演講，最初好少人聽，又講得差，但佢都堅持，不斷去好多學校爭取演講機會，練習練習再練習，最後令佢成為國際級的演說家。
我別相信你無天份，我只認為你仲可以進步，只要你再努力學習，不斷試，我相信這是你一條出路！加油！
（對照龔成信箱：Q7866）
7.現金流
拜讀閣下的投資分享好一段日子，明白投資需要利用時間好好安排。
我有一家四口，兩小孩尚幼，想為他們日後好好打算。唯自覺投資無方，現金流的增值速度遠未能追上通脹，苦思良久未有方向，只能眼白白看著手上現金貶值。
想請教老師，根據以下資產分佈，該如何佈署才可有每月
穩定的正現金流 (暫時目標 20K/月) ?
自住物業，估值 $9.3 M, ($4.5M 購入，按揭餘 $2.5M).
現金約 $50 萬
股票約 $50 萬，如下︰
騰訊 (500 股)、舜宇光學(100 股)、石藥(4,000股)、蒙牛 (1,000 股)、中國旺旺(100股)、中國平安(500股)、港交所(100股)
另持有 10 萬月供股 (每月供款共 $3,000)
騰訊、友邦、長江基建
家庭月入約50 K，無太多 monthly saving.
龔成老師：
比較好的做法，是運用「先增值，後現金流」作方法，你不用太心急這刻去追求現金流，反而這刻應投資較多增值類資產。
例如初期投資較有潛力的股票，令財富較快增值，到你的財富增值到一定金額後，可開始將財富分配至平穩增值型股票，才漸漸轉成收息型股票，著重現金流。
所以，這刻反而建議你集中在「增值」方面。
你可以投資在一些「平穩增值股」類別，以你的投資目標，以及家庭狀態，相信這是最好的。你現時投資的股票，其實都不差的，只是中短期市況令當中的表現一般。
現金部分，可以分注動用，只要起碼餘下$25萬現金就得。
如果你未有選潛力股的能力，未有掌握投資時機的能力，就可以簡單地投資盈富基金（2800）。但如果你可以選潛力股，其實都可以將餘下的現金，小部分投資在潛力股，部分在平穩增值股，這會較好。
至於每月供股，最好加大金額，每隻只是$1000會比較少，要較長時間先儲到一定的水平。
（對照龔成信箱：Q7867）
8.內銀股
老師您好，我想問內銀的前景如何？現在股價都比較低位，打算長線投資，請問是否入市機會？
龔成老師：
內銀的前景正面的，但你不能預佢增長力好勁。
因為當中的規模已大，同時有潛在的壞賬風險，因此不能預期佢地的股價會爆得好勁。這類股可投資，但最好是當成收息股，分注買入可以，長線投資可以。
（對照龔成信箱：Q7869）
9.通達集團（0698）
698跌落谷底 有反彈的機會？
高位錯手入市一直坐貨。
龔成老師：
通達集團（0698）本質算是不過不失，但佢同其他手機相關股的命運都是一樣，一年前被熱炒，股價被高估，其後市場冷卻，再加上手機行業出現增長減慢的情況，佢股價自然大幅回落。
這股都可以守下，但你要預佢中短期仍會較弱，要較長時間先可以守得翻上去。如持貨不過多，就守住先。
（對照龔成信箱：Q7870）
10.公用股
龔成老師：現在股票市場好像沒有甚麼起息, 更有消息指有股災先兆。
我現持有煤氣和香港電訊各一手，屬風險較低的公用股，你認為其受市場影響的波幅大嗎？
是否應該先趁現在提早離場？
謝謝你！
龔成老師：
我地投資股票就是投資企業，只要企業優質，長線投資，買入的價合理就可以了。至於短期股市有無起色，這不是重點。
另外，坊間有些人所謂的預期大市升跌，預期股災，這都是廢話！因為無人能預測股災的，真正的大跌市，是在全世界都無人估到的情況之下發生。當有人預期會大跌時，就不會大跌了！
你持有的都是優質股，只要你長線投資，根本就不用理會股價。
（對照龔成信箱：Q7871）
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
