人生荊棘是成功轉捩點 被動只會步向失敗｜Purple弟弟｜網民熱話
廣告
【網民熱話】人生不得意事十常八九，呢句我由細聽到已經心生疑惑！點解一句咁廢嘅句子都可以講得出口，邊個唔知道做人唔係一帆風順。直至長大後，對呢句說話又有另一番體會，「不得意」嘅事，的確係日日都出現緊，問題係我哋有冇珍惜，定純粹每次都係唔開心就完事。現實中好多人順風順水唔珍惜，但更多嘅係唔珍惜遇上荊棘。
被動係失敗嘅原因
喺我講點解要珍惜不如意事之前，唔知大家有冇留意到其實我哋大部分人都係屬於「被動」派。
想轉工，因為頂唔順上司，但一而再再而三咁忍住，終於第四次俾人逼到走投無路先肯搵工。
話想做運動每日收工跑下步，結果一星期跑得一次，最後係唔小心簽咗健身會藉，唔想嘥錢先日日收工上去跑跑步機。
我哋嘅失敗係源自我哋無動力俾自己，做咩都係被動式等人推，細個點入到大學？因為有啊媽呢個「動力」囉；
點解老師幫你報名參加比賽你會乖乖練習，因為唔想上台出醜囉。
所有動力都係來自外界，換句話說，其實只要你有動力，你都可以做得到。
珍惜人生的荊棘
不過人大咗，邊個仲得閒關心你，做你嘅人生「推手」喺身邊默默俾目標同動力你？
反而慘事就開始一籮籮，女朋友俾帽你戴、親人去世，種種不如意嘅事到底有咩值得「珍惜」？
其實呢到嘅「珍惜」，係指不如意事為你帶來嘅動力，你有冇好好把握？
女朋友嫌你窮，你選擇上網鬧佢水性陽花定係等佢將來後悔錯過你呢隻潛力股？
親人離去，想唔想佢哋係上面望到自己事業有成，生活過得好好，等佢哋唔使擔心我自己一個！
你人生到呢一刻其實出現過無數大小嘅荊棘，點解唔試下捉緊某幾個去化成自己嘅動力？！
人生不得意是十常八九，但我地其實一直都無珍惜過呢十常八九，係咪好可笑！
「慘」事只因你無把握
當你發現唔少成功人事背後，佢哋都可能有一個聽落你認為係「悲慘」嘅故事，可能有人係捱得好辛苦、可能有人坐過監。
不過當佢哋將悲痛化成動力之後，二十年三十年後回頭一望，你認為係「悲慘」嘅故事，正正就係佢哋最感恩嘅虐心狂想曲。
