月儲$8,000 5年內結婚 想達標可選以下組合 | 龔成信箱 | 月供股票
撰文：龔成 ｜圖片：新傳媒資料庫、unsplash
1.結婚
老師你好，我而家每月可儲$10000，想用其中$8000月供股票，目標係儲筆錢5年後結婚。
想問下可以點分配呢8千蚊？
龔成老師：
5年時間，都可以有一定的增長能力，但又不能過份進取，因為時間又唔算好長。
你可以將$6000投資平穩增值類的股票，例如盈富（2800）、金沙（1928）、港鐵（0066）、中銀（2388）、長建（1038）、領展（0823）等。餘下$2000供潛力股，例如比亞迪（1211）、中生製藥（1177）等。
你保持月供，不用理中短期的股價波動，長時期進行就得。餘下的每月$2000就儲現金，不要動用。
（對照龔成信箱：Q7479）
2.２１世紀教育（1598）
老師1598
839
我要不要繼續持有住呢
跌得好心痛
龔成老師：
２１世紀教育（1598）是近期其中一類熱炒的類別，因此之前一定以高估值上市，這是必然的，佢一年賺$4000萬，但現時市值$14億，就算股價下跌了，仍然不平。
教育股有前景的，但估值有少少貴，如果你持有不多，只有守住先。
中教控股（0839）亦有類似的情況，股價雖然比高位回落了不少，但市盈率仍達40倍，估值仍有少少貴，只可以話，如果你持有不多，只有守住先，這股不是無前景的，但要耐心一點。
（對照龔成信箱：Q7472）
3.月供股票
龔sir以下係我組合，請問有咩改善地方？
小弟今年25歲，每月只可儲$4000，其他已經係開支，另有$5000月供保險，5年期，已了供1年，請問5年後抵押保險，再買股票可行嗎？
2638 $7.19 10000股
1448 $6.41 10000股
178 $2.86 10000股
808 $3.20 10000股
1928 $39.1 1200股
1211 $58.4 1000股
16 $126.9 1000股
龔成老師：
你上述持有的，都是有質素的股票，都有長線投資的價值，基本上一直持有就得，不用理現時的股價。
你以每月$5000去供保險，以你的年齡，有少少多，保險是理財中防守的部分，當然有其作用，但就不用太多，因為做好防守後，餘下的資金就應作進攻。5年後抵押保險，這都可以考慮，但到要再睇情況，不用心急這刻去想。
另外，港燈（2638）是收息股，都是一部防守性的工具，你持有這數已足夠，之後不用再增持。
你之後可集中增持一些平穩增值類的股票，例如盈富（2800）等會較好。
（對照龔成信箱：Q7473）
4.銀娛（0027）
龔SIR 其實金沙同銀娛比較 邊一間較優勝？
坊間比較多人推介銀娛 較多人提及 究竟兩者質素上有咩唔同 令較人偏愛銀娛呢？
龔成老師：
兩隻都是好優質的股票，都有投資價值。金沙（1928）會較為穩健，佢派息較高，企業已過了發展最高峰的時期，所以之後會較為平穩。至於銀娛（0027），則潛力較大，因為佢仍處於不斷投資，發展的階段，銀娛第3、4期項目，橫琴項目，都是佢的潛力。
所以，兩隻都優質，都有投資價值，但要睇下你的投資目標。
（對照龔成信箱：Q7474）
5.黃金
老師，想問幾個問題:
1. 你講過分散風險的重要性，一般散戶持有十隻股票左右(如無記?)會比較穩健。
我完全不介意做十隻以上股票研究但我覺得同時follow 十間公司的最新狀態會花太多時間精力。 我更傾向持有五、六隻我最了解、最有信心的股票，然后密切留意。
你覺得合理嗎? 當一隻股票有頗高的流通性風險時，如何決定(計算)持有數量去減低風險呢?
2. 市值小的企業是否通常比市值大的更有潛力呢?
3. 我目前組合有15%係黃金ETF, 你認為資金配置之中有黃金係明智嗎?
4. 我對福壽園可能過於樂觀，覺得冇得輸，睇唔到佢有乜負面因素。 我怕自己太主觀，想問佢有乜潛在風險呢?
5. 想問你對億勝生物科技有何看法? 近年我都係靠自己分析，唔再抄功課，但由於將來可能增持到20%，所以要參考高手意見。 我明白我地行外人好難分析佢企業護城河同發展前景，但睇返ROE ROA、現金流量表以及其他數據，睇?而間企業都有一定質素，成哥同意嗎?
Thanks very much !
龔成老師：
1）一個成熟的組合（$100萬以上），一般都建議持有10-15隻股票，以分散風險，當然，資金較少的，持股數目會較少。
集中持有5隻最了解的股票，都可以，但難勉會提高了風險，如果你不想花太多時間去跟這些股票，其實可以簡單在綑合中加上盈富（2800），已經可以解決這問題，達到平衡風險的作用。
要睇流通量少的具體情況，如果較小的都可接受，因為只是影響買賣差價，但如果極少，就要小心一點，甚至避免投資。
2）一般來說，中小型企業的增長力的確較高，但同時失敗的機會率亦會較高。
3）將組合中其中一部分投資黃金是適當的，但一般不會太多，1%-3%已足夠，這點我在股票班都有解釋過。
4）所有企業都有風險的，佢雖然是龍頭，但都會有競爭，同埋佢行高檔路線，如果經濟轉差，就會有較大的影響。另外，佢之前估值不低（這點我過往一直強調），所以投資時要小注分注咁去入。
5）億勝生物科技（1061）旗下眼科生物藥品貝復舒系列，適用於各種眼表創傷修復疾病，包括乾眼症、角膜炎、角膜擦傷、角膜手術（如視力矯正及白內障手術等）。
我相信佢的藥，其實其他公司都有做，所以好難話有明顯的護城河。加上佢規模唔算好大，一年生意約$10億，一年現金流約$2億。如果同行要投放好大資金去做研發，佢未必跟到，所以未必有明顯的優勢。
但這股本質都不差，近年增長好，股本回報率高，賺錢能力不差，財務穩健，負債不多，加上企業不太大，有潛力。同時市盈率不算高，因此有投資價值。
（對照龔成信箱：Q7475）
6.優質股
龔sir,如果以而家的情況來睇，優質股只會升唔會跌，而家都三四萬蚊一手，列如中電，領展。
咁再過十五到廿年，工資不加的情況下，窮人是否越來越難向上流，會不會終有一天，向上流的道路會完全賭塞，我們的下一代會完全沒有希望呢。
我三十八蚊入金沙同十六蚊入吉利，估值會唔會好貴
吉利跟比亞迪，誰更有前景？另外，小米十七蚊估值是否仍然好貴
成哥，你點睇恆生指數成份股呢，現在偏貴還是便宜
龔成老師：
優質企業因為擁有優勢，所以長遠價值一定向上，不過，中短期一定會有上落的。
每個時代有唔同的方法，不會無路上的，正如過往不少人投資物業致富，到了而家，再投資物業的回報率已大減，由零開始利用物業致富已不再是道路，但股票市場仍有好多機會，只要小心發掘潛力股，都是一條致富的路。
金沙（1928）同吉利（0175）的買入價都算合理，並不貴，長線投資就得。小米（1810）就好難講，因為這企業仍處燒銀紙狀態，好難估值，有危有機。
比亞迪（1211）同吉利都有潛力的，比亞迪會較高。
恆指現處合理水平。
（對照龔成信箱：Q7476）
7.收息股
龔成老師，你好! 我今年19歲，仍在求學階段，間中返下part time，儲到$60000，想買股票收息，想問下邊個配搭係最好。
1. 港鐵公司(00066) 1手
2. 匯豐控股(00005) 1手/ 盈富基金(02800) 2手/ 泓富產業信託(00808) 10手
3. 精英匯集團(01775) 2手
或者會唔會有更好的配搭以我目前的資金黎講。
謝謝龔老師
龔成老師：
19歲能儲到$6萬，相當不錯。這刻你仍未到正式有收入、創富的階段，可以把握這段時間，好好學習投資知識，對將來財富相信有好大的影響。
以上述的股票來說，盈富（2800）、港鐵（0066）、泓富（0808）是最好的，這都是有質素，有前景的，你可以長線持有這些股票。
另外，最好不要用盡所有資金，要留有一些現金。
（對照龔成信箱：Q7477）
8.平穩增值
龔Sir你好。我每月可以月供$10000，打算月供5隻股票，每隻$2000，分別：
3（煤氣）、66（港鐵）、823（領展）、2388（中銀香港），772（閱文），組合上有冇問題？
或者有冇其他股票可以再加入去個組合入面。我的投資目標係平穩增長加收息。
龔成老師：
上述的股票，大多是有質素的，基本上可以長期進行月供，無問題，能帶比你平穩增值及有股息的效果。每月每隻供$2000可以，長期進行就得。
閱文集團（0772）則比較特別，這股不是無潛力，但這刻的盈利仍不是好多，但市值都有成$600億，當中包括了一定的「預期因素」。這股都可以月供，但你要明白當中的風險，可以變得好勁，又或者令人失望，這刻未知的。
（對照龔成信箱：Q7478）
9.潛力股
請問我而家有1萬幾蚊 想應該以月供形式買入潛力股票 定係1炮過買入會較好
另外想問下裕元集團呢隻股點睇 睇佢個周息率有23% 現價21.4都算好低位了 而家入手可以嗎?
龔成老師：
分注買入點都係較好的策略，當然，有時是較難分注的，但如果可以，都盡量分注。因為潛力股的股價上落可以好大，一次過買入好易一次過在高位中招，所以，分開多次入，可以將買入價平均，風險能有效減低。
裕元集團（0551）本質不差的，業務穩定，盈利亦不錯，有投資的價值，但唔好單單比佢的股息吸引，因為上年派左特別股息，相信下年未必會有，所以股息率不能作準。
這股雖然本質不差，但佢近年有增長減慢的情況，生意無明顯增長，盈利亦只是平穩，因此，投資這股不能對股價有太大的期望。
這股現時的市盈率約10倍，估值合理，可分注買入，但你預佢之後平穩，如果用正常的年度派息計，現時股息率約為5%、6%，你預收下息咁樣，股價不會好強。
（對照龔成信箱：Q7480）
10.退休開支
你好龔先生
請問如60歲剛退休，退休金520萬，有一自住物業，但未供按揭260萬，有一車位收$2300租，另有年金約$3000，財富管理上應如何安排呢？謝謝
龔成老師：
由於已有物業及車位，因此暫時不建議再投資這類項目，而會選擇投資其他項目，咁樣會令財富組合更加平衡。
可以考慮分成3部分，第一部分投資收息股，建立一個收息股的組合，例如香港電訊（6823）、港燈（2638）、深高速（0548）、工行（1398）、置富（0778）等，咁樣的風險就能分散。
這些都是股息率約5、6%%的股票，同埋企業本質不差，假設你將資金$200萬投資收息股，平均每月可收到約$10000的股息收入，都算不錯的。記住，不用理中短期股價，只要集中收息就得。
第二部分就是投資銀行或保險公司的產品，最緊要是風險低的，目的是收息，以得到穩定的現金流。
第三部分就是持有現金，這部分除了可作防守外，亦可作等投資機會之用。若果日後的樓市及車位價大跌，去到吸引的回報率水平，就可投資。不過要到時再分析，這部分不用急。
（對照龔成信箱：Q7481）
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
