人工$13,000 好想向上流 思想窮比銀包空更恐怖｜Purple弟弟｜網民熱話

撰文：Purple弟弟 ｜ 圖片：unsplash、PhotoAC、電視截圖

唔係歧視窮　而係歧視佢哋特質

相信唔少人都聽過對於某部分男仔嚟講，女仔講粗口係佢哋心目中係加分！

好多人會不解，但其實佢哋都知「講粗口」呢樣嘢唔係好事，但佢哋鍾意嘅係「講粗口」呢種女仔嘅特質。

因為好多時呢類女仔會比較不拘小節、收放自如，對住朋友可以好癲，對住屋企人又可以文雅端莊。

同樣地，我唔係討厭窮人，更何況我都係。

而係我頂唔順佢哋嘅特質，我總結咗以下幾種，唔知大家有冇同感。

慳埋無謂嘢

我明白你窮當然要顧慮金錢，但有時關乎健康嘅事都求求其其，三餐唔定時我當係工作環境所逼，但點都會有午膳時間。

但好多打工仔為慳錢咬個包就算，以健康做代價，仲要未必慳到好多，病咗仲得不償失。

而且佢哋只會不停諗「節流」，我心諗節乜鬼，你本身搵咁少仲可以點節？不如諗下點搵多少少向「開源」方面發展啦。

窮到視野狹窄

窮人喺比較政治同深度少少嘅話題上永遠都傾唔埋，講政治又話「關我鬼事」，討論少少熱話，角度又嚇死你！

以消委會最新話某國產店出售嘅20蚊洗面奶CP值高於名牌為例，我都有同我身邊嘅人討論下。

結果佢地只係覺得「哇！咁買名牌做咩？！」

於是我嘗試同佢哋分享我睇法，我覺得比嚟無意思，咁名牌個名都值少少錢，再加上人哋都要開發配方，可能材料係平，但背後都花唔少錢。

而國產店賣得平，係因為一句唔該就拎個人哋個配方加加減減，實平少少。

但結果只換嚟一句：「我唔知啦，總之依家就係佢又平又好用！」

但可笑嘅係佢哋又會網購仿真名牌衫，唔係話又平又好用就得啦咩？

做事無邏輯

收入低嘅人好多時都衰在唔肯再去了解任何事，學習任何新事物，但又想嘗試新嘢！

就好似我明明唔識踢波，但我好想踢，我唔理，我要買曬好貴嘅波鞋波衫先至諗！

所以你見唔少打工仔，佢地嘅投資理念唔係嚟自電視上嘅分析師、就係陳師奶。

輸打贏要又唔肯學

問佢點解要買呢隻，永遠就話人哋都買咗唔通呃我咩？！

問佢點解睇升，潛力？財報？現價合唔合理？通通都唔知！

不過都算，最慘係佢哋輸錢會怪人，明明人哋只係分享自己睇法覺得會升，你就自己盲跟，可以怪邊個？

唔講投資，講返工作，有時上司頒布無謂政策，佢哋都只會死跟，無人諗過合唔合理，係咪真係有成效！

唉，我真係好想向上流，脫離呢個圈子嘅人啊，思想窮比銀包空可怕100倍！