旅行起碼買到個開心 13,000蚊人工 去旅行反而更慳錢｜Purple弟弟｜網民熱話
旅行更慳錢
不過當我自己去多幾次旅行之後，我發覺，旅行其實根本唔係花大錢之事，尤其係去東南亞地方，反而去多幾次你仲慳返唔少添！
如果同樣係放7日長期，假設你要係香港同女朋友過，淨係酒店都講緊收你最少500蚊一日！
仲要未計香港酒店其實好細，去東南亞地方如泰國、越南，200蚊鬆啲已經可以住得又大又舒服。
當然，200蚊未必係當地租到5星級大酒店，Book到嘅可能只係民宿或者air bnb，但已經比香港優質好多。
同樣係200蚊，你喺香港只係可以Book到時鐘格局嘅劏房 －只有一張床左右空間嘅房。
九成女朋友都唔會接受到，所以都係乖乖地比酒店呢500蚊。
有錢才是美食之都
喺香港食泰國嘢為例，炒碟通菜都收你最少70蚊，仲要勁細碟！
喺泰國你是但入一間餐廳，10蚊港幣已經可以食到一大碟有鑊氣、好食過香港餐廳炒嘅通菜。
即使係遊客區餐廳，比盡都係收你25蚊一碟，有時愈去旅行就越憎香港，要服務無服務，要質素就要比貴100倍。
而且近年好興飲品店，尤其係乜乜奶蓋、物身黑糖鮮奶之類，賣到最平都20至30蚊一杯。
好唔好飲我唔評論，但當一個城市嘅嘢飲價錢逼近食一個正餐之時，其實已經好離譜！
不過可能我見識少，佢哋定價就係行奢侈、高檔路線，唔係平民嘢飲！
香港7-11嘅罐裝可樂都無咁平
但30蚊港紙，去其他國家有唔少已經可以坐喺一個舒適嘅開揚空間，聽住有情懷嘅古典音樂，整返杯Flat White。
更遑論東南亞國家好多街邊檔都有鮮榨果汁、普通奶茶咖啡咁，都係講緊7、8蚊一杯，連香港7-11嘅罐裝可樂都無咁平。
香港生活咩都貴 旅行最多都係貴在機票
喺香港玩7日(唔計有居所)消費貴過泰國、越南等地，同日本、新加坡等又差唔多。
咁其實已經可以斷言，我去旅行都只係貴在機票！
所以我絕對唔認同去旅行係使大錢，只係視乎你去邊，同點消費。
話去旅行貴嘅人只係食米唔知米貴，問問你父母煮一餐用幾多？問問父母交租用幾多？
留喺香港你之所以會使少咗，只係因為你同屋企人共同分配資源。
當有一日你同我一樣係孤家寡人，其實去旅行真係慳到錢！
有門路，仲可以幫人做少少代購賺埋錢都仲得！
而我哋年輕人之所以鍾意去旅行，更多唔係因為錢，而係我付出同等金錢，係外地比到嘅質素已經差天共地。
有人話去少幾次日本就買到樓，我就話，去多幾次旅行，身心、荷包都開心到暈。
